ជារៀងរាល់ឆ្នាំ ពុទ្ធសាសនិកខ្មែរយើង តែងតែប្រារព្ធធ្វើពិធីបុណ្យវិសាខបូជា នៅគ្រប់វត្តអារាមទូទាំងប្រទេស ដោយចាត់ទុកថាជាការបំពេញកុសលដ៏ថ្លៃថ្លាបំផុត។
ក្នុងនោះដែរ កៀកនឹងថ្ងៃពិធីបុណ្យខិតជិតមកដល់ នៅថ្ងៃទី ០៥ ខែឧសភា ឆ្នាំ ២០២៥ វត្តនិគ្រោធវ័នគល់ទទឹង បានជូនដំណឹងពីកម្មវិធីបុណ្យមហាវិសាខបូជា ដែលនឹងប្រារព្ធនៅវត្តនិគ្រោធវ័ន គល់ទទឹង នៅថ្ងៃអាទិត្យ ១៥ កើត ខែពិសាខ ឆ្នាំម្សាញ់ សប្តស័ក ព.ស ២៥៦៨ ត្រូវនឹងថ្ងៃទី ១១ ខែឧសភា ឆ្នាំ ២០២៥ ដែលនឹងមានពិធីដង្ហែក្បួនមហាវិសាខបូជា និង ព្រះបរមសារីរិកធាតុ ជុំវិញបរិវេណវត្តដូចរាល់ឆ្នាំ ព្រមទាំងមានពិធីរាប់បាត្រព្រះសង្ឃចំនួន ២០៨ ព្រះអង្គ មានបង្ហូតទង់សាសនា បង្ហោះប៉េងប៉ោង បូជាប្រទីប និង កម្មវិធីជាច្រើនទៀតផងដែរ។
គួរឱ្យដឹងថា បុណ្យវិសាខបូជា គឺជាបុណ្យមួយក្នុងបណ្តាបុណ្យធំៗទាំងឡាយ ក្នុងព្រះពុទ្ធសាសនា ដែលប្រទេសកាន់ព្រះពុទ្ធសាសនាលើសកលលោក តែងតែប្រារព្ធធ្វើពុំដែលខាន ដើម្បីរំឭកដល់ព្រឹត្តិការណ៍ដ៏សំខាន់ ៣ យ៉ាង របស់ព្រះពុទ្ធបរមគ្រូ គឺទី ១ ថ្ងៃព្រះអង្គប្រសូត ទី ២ ថ្ងៃព្រះអង្គត្រាស់ដឹង និង ទី ៣ ថ្ងៃព្រះអង្គបរិនិព្វាន៕
សូមអានលម្អិតកម្មវិធីបុណ្យនៅខាងក្រោម ៖
