កាលពីអំឡុងចុងខែវិច្ឆិកា ឆ្នាំ ២០២៤ កន្លងទៅ មហាជនផ្ទុះសរសើរចំពោះដំណើរនៃការរៀបចំព្រឹត្តិការណ៍ «ស្នាមញញឹមនៃកម្ពុជា» លើកទី ១ និង លើកទី ២ ដែលរៀបចំឡើងនៅលើទឹកដីអច្ឆរិយៈនាខេត្តសៀមរាប ដោយមានមានសិល្បករ សិល្បការិនី និង ប្រជាជនខ្មែរជាច្រើនបានចូលរួមផ្សព្វផ្សាយនូវវប្បធម៌ អរិយធម៌ដ៏សម្បូរបែបរបស់កម្ពុជានៅលើបណ្តាញសង្គមជាបន្តបន្ទាប់។
ក្នុងនោះដែរ គេចាំបានថា វីដេអូមួយ ដែលផលិតឡើងដោយអតីតអ្នកកនាំសម្តែងដ៏ល្បី គឺឧកញ៉ា ប៊ុន រតនា ហៅ សេម និង ភរិយាជាអតីតតារាស្រី លោកជំទាវ លីឈី ក៏បានចូលរួមក្នុងការផ្សព្វផ្សាយពីកម្ពុជាទៅកាន់ពិភពលោកដូចគ្នាដែរ ដោយស្វាមីភរិយាអតីតអ្នកសិល្បៈមួយគូនេះ បានផលិតវីដេអូមួយនៅលើទឹកដីប្រាសាទអង្គរតូច បង្ហាញពីអាណាចក្រខ្មែរសតវត្សទី ១២ ។
ក្នុងនោះ ឧកញ៉ា ប៊ុន រតនា និង លោកជំទាវ លីឈី បានផលិតវីដេអូមួយ យោងតាមអត្ថន័យដើម ដកស្រង់ចេញពីបទ «កុលបុត្រមហានគរ» និពន្ធដោយ ឯកឧត្តម ហ៊ុន ហេង ច្រៀងដោយអ្នកនាង ស៊ុន ស្រីពេជ្រ ដោយបានបង្ហាញនូវប្រាង្គប្រាសាទអង្គរវត្ត និង ឈុតនាសម័យមហានគរដ៏អស្ចារ្យ។
យ៉ាងណាមិញ ក្រោយវីដេអូបានផ្ទុះការចែករំលែក និង ទស្សនាជាច្រើនហើយនោះ កាលពីថ្ងៃទី ២៧ ខែកុម្ភៈ ឆ្នាំ ២០២៥ នេះ ឧកញ៉ា ប៊ុន រតនា និង ជំទាវ លីឈី ត្រូវបានក្រសួងទេសចរណ៍ផ្តល់ជូននូវលិខិតសរសើរជូនទាំងស្វាមីភរិយាតែម្តង។ លើសពីនោះ ក្រៅពី ឧកញ៉ា ប៊ុន រតនា និង ជំទាវ លីឈី ក៏មានអ្នកផលិតមាតិកាប្រមាណជា ១០០ នាក់ ដែលទទួលបានលិខិតសរសើរ ពីស្នាដៃនៃការចូលរួមផ្សព្វផ្សាយសម្បត្តិវប្បធម៌ អរិយធម៌របស់កម្ពុជាផងដែរ៕
