កាលពីថ្មីៗកន្លងទៅ ទាក់ទងនឹងជីវិតឯកជនរបស់អតីតតារាស្រី វ៉ាង ស្រីណូ បានធ្វើឱ្យមហាជនអ្នកគាំទ្រលើហ្វេសប៊ុកចាប់អារម្មណ៍ភ្ញាក់ផ្អើល ខណៈឃើញអ្នកនាងបង្ហាញពីរបស់ទ្រព្យជាញើសឈាមរបស់នាង ដែលខំចាយលុយរាប់ម៉ឺនទៅទិញ គឺជាគ្រឿងអលង្កាពេជ្រសុទ្ធទាំងដុំៗ តែចង់លក់វិញបែរជាមិនអាចលក់បាន ដោយសារម្ចាស់ហាងពេជ្របានបិទហាងប្រមូលលុយរត់ចោលស្រុក និង មិនដោះស្រាយឱ្យនាងលក់គ្រឿងចេញវិញ។
ក្នុងនោះ អ្នកនាង វ៉ាង ស្រីណូ បានបង្ហោះរៀបរាប់លើហ្វេសប៊ុកថា ៖ «ហាងពេជ្រនៅម្តុំផ្សារថ្មីបិទហាងប្រមូលលុយរត់ចោលស្រុកអត់ដោះស្រាយឱ្យខ្ញុំយកគ្រឿងទៅលក់ឱ្យអ្នកណា? ពេជ្រសុទ្ធ មិនត្រូវក្លាយជាអំបែងកែវហើយទេ? ញើសឈាមខ្ញុំ ស្អែកជួបគ្នាក្នុងកាឡាយ»។
ក្រោយបង្ហោះទម្លាយពីហាងពេជ្រប្រមូលលុយរត់ចោលស្រុក ពេលនេះ អ្នកនាង វ៉ាង ស្រីណូ ក៏បានបង្ហោះវីដេអូប្រាប់ពីឈ្មោះច្បាស់ៗរបស់ហាងពេជ្រនោះ មានទីតាំងនៅម្ដុំផ្សារថ្មី ដែលមានយីហោរថា «ហាងមាសពេជ្រ គួង ហុង»។ ក្នុងនោះ អ្នកនាង ក៏បានឱ្យដឹងថាហាងពេជ្រនោះ នៅបើកធម្មតា ប៉ុន្តែបុគ្គលិកប្រាប់ថាម្ចាស់បានទៅក្រៅប្រទេស ដែលមិនទទួលខុសត្រូវលើគ្រឿងពេជ្រដែលនាងបានចាយលុយទិញអស់ខ្ទង់សែនដុល្លារ គឺខាងហាងមិនទទួលទិញចូលវិញឡើយ។
ជាមួយគ្នានោះ អ្នកនាង វ៉ាង ស្រីណូ ក៏បានរៀបរាប់ភ្ជាប់ជាមួយវីដេអូថា ៖ «ហាងពេជ្រ គួង ហុង ឈប់ធ្វើបាបខ្មែរគ្នាឯង ហើយឆាប់ចេញមុខមកទទួលខុសត្រូវទិញចូលគ្រឿងពេជ្រដែលខ្ញុំទិញពីអ្នកឯងទៅវិញភ្លាម សុំស៊ែរបន្ទាន់ផងបងប្អូន»៕
សូមចុចទីនេះដើម្បីទស្សនាវីដេអូ៖
