ថ្មីៗនេះ អ្នកនិយមតាមដានវិស័យសិល្បៈបុរាណកំពុងបង្ហាញការព្រួយបារម្ភ ដល់ លោក ណាឃីម ជាសិល្បករចម្រៀងផ្នែកបុរាណ និង សមាជិកក្រុមតន្ត្រីបុរាណរបស់អ្នកនាង ខាត់ សួស្តី ដែលកំពុងធ្លាក់ខ្លួនឈឺខ្លាំងកំពុងសម្រាកព្យាបាលនៅមន្ទីរពេទ្យ។
ក្នុងនោះ បើតាមការឱ្យដឹងពីអ្នកនាង ខាត់ សួស្តី ទទួលបានដំណឹងពីក្រុមគ្រួសាររបស់តារាចម្រៀងបុរាណ លោក ណាឃីម បានឱ្យដឹងថា លោក ណាឃីម មានជំងឺរលាកស្រោមខួរ, រលាកសួតធ្ងន់ធ្ងរ និង ក្រពះពោះវៀន។ បច្ចុប្បន្ន លោក ណាឃីម មានអាការវង្វេង ភ្នែកមើលលែងឃើញ ត្រចៀកស្តាប់លែងឮ នោមមិនចេញ និង បាយមិនបានផងដែរ។ លើសពីនោះ អ្នកនាង ខាត់ សួស្តី និង មិត្តទាំងក្នុង ក្រៅសិល្បៈជាច្រើន បាន និង កំពុងបន្តស្វែងរកថវិកាជួយដល់លោក ណាឃីម និង អំពាវនាវដល់មហាជនឱ្យជួយបរិច្ចាគដល់លោកផង ខណៈក្រុមគ្រួសារកំពុងជួបការលំបាកក្នុងការចំណាយព្យាបាល។
ដោយឡែកនៅរសៀលថ្ងៃទី ១៤ ខែតុលា ឆ្នាំ ២០២៥ នេះ តាមរយៈការបង្ហោះវីដេអូ និង ឱ្យដឹងពីមិត្តភក្តិក្នុងវិស័យសិល្បៈបុរាណ គឺលោក ព្រហ្ម ប្រសិទ្ធី បានឱ្យដឹងថា លោក ណាឃីម បានបញ្ជូនទៅដល់មន្ទីរពេទ្យនៅប្រទេសវៀតណាមហើយ ដោយមានរូបលោករួមដំណើរទៅជាមួយ។
ក្នុងនោះ លោក ព្រហ្ម ប្រសិទ្ធី បានបន្ថែមថា ប្រសិនបើទៅស្ថានភាពរបស់លោក ណាឃីម ធូរស្រាល ឬក៏បែបណា លោកនឹងជម្រាបបន្ថែមទៀត៕
សូមចុចទីនេះ ដើម្បីទស្សនាវីដេអូ៖
