មិនត្រឹមតែអភិរក្ស និង អភិវឌ្ឍន៍ ម្ហូបខ្មែរ ចុងភៅណាក់ (Chef Nak) ដែលជាចុងភៅស្រីល្បីល្បាញដំបូងគេនៅកម្ពុជា ក៏រមែងផ្សព្វផ្សាយម្ហូបខ្មែរ រហូតដល់ឆាកអន្តរជាតិ។ ថ្មីៗនេះ កេរ្តិ៍ឈ្មោះកាន់តែសព្វសាយបន្ថែមទៀត ដោយ ចុងភៅ ណាក់ ត្រូវបានទស្សនាវដ្តីដ៏ល្បីរបស់ចក្រភពអង់គ្លេស Foodism UK ចុះផ្សាយអំពីបេសកកម្ម ក្នុងការអភិរក្ស អភិវឌ្ឍន៍ និង ផ្សព្វផ្សាយម្ហូបខ្មែរ។
ជាមួយអារម្មណ៍រំភើប ចុងភៅណាក់ បានបង្ហោះរូបភាពទំព័រទស្សនាវដ្តី អមដោយសាររៀបរាប់យ៉ាងដូច្នេះថា៖ «ខ្ញុំរីករាយ និង មានកិត្តិយសណាស់ ដែលទស្សនាវដ្តី Foodism UK របស់ចក្រភពអង់គ្លេសបានចែករំលែកនូវបេសកកម្មរបស់យើង ក្នុងការអភិរក្ស អភិវឌ្ឍន៍ និង ផ្សព្វផ្សាយម្ហូបខ្មែរ។ បន្តិចម្ដងៗ យើងទាំងអស់គ្នា និង មានមោទកភាពចំពោះម្ហូបខ្មែរ បន្តផ្សារភ្ជាប់ឫសគល់នៃមរតកវប្បធម៌ និង បំផុសចក្ខុវិស័យដ៏រុងរឿងនាពេលអនាគត។»
គួរឱ្យដឹងដែរថា តាមរយៈបេសកកម្មអភិរក្ស អភិវឌ្ឍន៍ និង ផ្សព្វផ្សាយម្ហូបខ្មែរ ចុងភៅណាក់ ក៏បានចងក្រងសៀវភៅធ្វើម្ហូបខ្មែរចំនួនពីរ គឺ សៀវភៅដំបូងក្នុងឆ្នាំ ២០១៩ ក្រោមចំណងជើង «ញុំា» និង ចុងក្រោយនេះ សៀវភៅ ជំណងជើង «សោយ» ឬ “SAOY-Royal Cambodian Home Cuisine”។ សៀវភៅនេះ ទៀតសោតទទួលបានពានរង្វាន់ Gourmand Award នៅក្នុងកម្មវិធី សៀវភៅធ្វើម្ហូបល្អបំផុតនៅលើពិភពលោកឆ្នាំ ២០២៣ (Best of the Best Cookbook in the World 2023)។ ហើយពានរង្វាន់នេះដែរ ត្រូវបានសារព័ត៌មានអន្តរជាតិដាក់រហ័សនាមឱ្យថាជា «ពានរង្វាន់អូស្ការ» នៅក្នុងវិស័យពានរង្វាន់ម្ហូបអាហារ៕
