ដូចមហាជនបានជ្រាបហើយថា តារាចម្រៀងរ៉េប វណ្ណដា មិនត្រឹមតែមានភាពល្បីល្បាញក្នុងប្រទេសកម្ពុជានោះទេ តែលោកគឺជាតារាចម្រៀងរ៉េបវ័យក្មេងត្រូវបានបរទេសស្គាល់ជាតារាចម្រៀងរ៉េបកម្ពុជា ដែលតែងបង្ហាញវប្បធម៌ អរិយធម៌ទៅកាន់ពិភពលោក។
ងាកមកកាន់ការផលិតបទចម្រៀងក៏ដូចគ្នា រយៈពេល ៨ ឆ្នាំមកនេះ វណ្ណដា បានផលិតបទចម្រៀងជាច្រើនបទ ដោយក្នុងនោះលោកបានបញ្ចេញ Album ចម្រៀងយ៉ាងកក្រើក រួមមាន «$KULL» និង «$KULL 2»។ ថ្មីៗនេះ តារាចម្រៀងរ៉េប វណ្ណក៏បានបញ្ចេញ Album ទី ៣ «Treyvisai» របស់លោកចំនួន ២ ផ្នែក រួចរាល់ហើយដែរ ដោយផ្នែកទី ៣ នឹងត្រៀមបង្ហាញក្នុងខែឧសភា ឆ្នាំ ២០២៥ ខាងមុខនេះ។
ក្នុងនោះ Album «TREYVISAI» របស់កំពូលតារាចម្រៀងរ៉េប វណ្ណដា ដែលចែកចេញជា ៣ ផ្នែកសំខាន់ៗ ដោយផ្នែកទី ១ «TREYVISAI I: The Search For Light» ដែលបានចេញរួចរាល់ហើយ កាលពីថ្ងៃទទី ១៤ ខែមីនា ឆ្នាំ ២០២៥ ដោយមានចម្រៀងចំនួន ៨ បទ។ រីឯ «TREYVISAI II: Burn Like The Sun» ក៏បានបញ្ចេញរួចរាល់ដូចគ្នាដែរ កាលពីថ្ងៃ ទី ២១ ខែមីនា ឆ្នាំ ២០២៥ កន្លងទៅ។ ចំណែកផ្នែកចុងក្រោយ គឺ «TREYVISAI III» នឹងបង្ហាញនៅថ្ងៃទី ១ ខែឧសភា ឆ្នាំ ២០២៥ ខាងមុខនេះ។
ដោយឡែក ក្រោយបង្ហាញ Album ចម្រៀងទី ៣ ចំនួន ២ ផ្នែក រួចរាល់ហើយនោះ កាលពីរាត្រីថ្ងៃទី ២៦ ខែមីនា ឆ្នាំ ២០២៥ កន្លងទៅនេះ វណ្ណដា បានធ្វើឱ្យអ្នកគាំទ្ររំភើបជាថ្មី ក្រោយលោកបង្ហោះវីដេអូបង្ហើបដំរួយនៃការធ្វើខនសឺតខ្នាតធំក្នុងពេលឆាប់ៗខាងមុខនេះ ដើម្បីសម្ពោធផ្នែកទី ៣ នៃ Album ទី ៣ ជាផ្លូវការ។
អ្វីដែលកាន់តែពិសេសទៀតនោះ គម្រោងនៃការធ្វើខនសឺតខ្នាតធំរបស់ វណ្ណដា នាពេលខាងមុខនេះដែរ លោកក៏បានស្ទង់មតិរបស់អ្នកគាំទ្រនៃតម្លៃការលក់សំបុត្រ ដើម្បីឱ្យទទួលយកបានសម្រាប់អ្នកគាំទ្រទាំងអស់គ្នា ក៏ព្រោះតែការប្រគំតន្ត្រីខាងមុខនេះលោកនឹងរៀបចំខ្នាតយក្ស និង ចង់ឱ្យអ្នកគាំទ្រចូលរួមបានទាំងអស់គ្នា៕
សូមចុចទីនេះ ដើម្បីទស្សនាវីដេអូ៖
