ពិតជាគួរឱ្យច្រណែន ដែលថ្មីៗនេះ គូស្នេហ៍បុរសភេទដូចគ្នាមួយគូ បានជ្រើសរើសទីតាំងទឹកដីខេត្តសៀមរាប ជាកន្លែងបង្កើតអនុស្សាវរីយ៍ អបអរខួបអាពាហ៍ពិពាហ៍របស់ពួកគេ។
ជាក់ស្តែង តាមការបង្ហោះរូបភាពដោយគណនីហ្វេសប៊ុក Rhonee Rojas លោកបានបង្ហាញពីភាពផ្អែមល្ហែម និង មើលមករ៉ូមែនទិកបំផុត ថតនៅទីតាំងភ្នំគូលែន និង ប្រាសាទបុរាណយើង។
លោកថែមទាំងភ្ជាប់មកជាមួយ Caption យ៉ាងមានន័យ សរសេរជាអង់គ្លេស ដែលមានអត្ថន័យជាភាសាខ្មែរថា៖ «រីករាយខួបអាពាហ៍ពិពាហ៍ ៨ ឆ្នាំ ទៅកាន់ស្វាមីដ៏អស្ចារ្យរបស់ខ្ញុំ Khoa Tran។ ពេលវេលាពិតជាដើរលឿនខ្លាំងណាស់។ ដោយសារតែអ្នក ខ្ញុំសើចច្រើនជាងយំ និង ញញឹមបានកាន់តែច្រើនថែមទៀត។ រាល់ពេលដែលខ្ញុំគិតពីអ្នក ខ្ញុំតែងមានអារម្មណ៍មានសំណាងបំផុតដែលមានអ្នក។ អរគុណអ្នកសម្រាប់ធ្វើជាស្វាមី និង ជាអ្វីៗគ្រប់យ៉ាងរបស់ខ្ញុំ។ នេះជាសុភមង្គលដែលយើងនឹងបន្តដំណើរជាមួយគ្នាច្រើនឆ្នាំទៀត។
មែនទែនទៅ កាលពីឆ្នាំ ២០២៤ គូស្នេហ៍មួយគូនេះ បានមកលេងប្រាសាទអង្គរវត្ត និង បានបង្ហោះរូបភាពធ្វើឱ្យផ្ទុះការចាប់អារម្មណ៍ជាខ្លាំង។ អ្នកទាំងពីរ គឺជាគូស្នេហ៍បុរសស្រឡាញ់បុរស ដែលមានប្រជាប្រិយភាពនៅលើបណ្តាញសង្គម ជារឿយៗពួកគេតែងធ្វើដំណើរកម្សាន្តបង្កើតអនុស្សាវរីយ៍ផ្អែមល្ហែមនៅជុំវិញពិភពលោក។ ដូចនេះ តាមរយៈការបង្ហោះរូបភាព Check in នៅកម្ពុជា ក៏ជាផ្នែកមួយផ្សព្វផ្សាយតំបន់ទេសចរណ៍យើងឱ្យបរទេសបានស្គាល់ទូលំទូលាយផងដែរ៕
