ថៃ សម្រេចប្ដូរចិត្តវិញ លុបចោលវិធានការពិនិត្យកាតវ៉ាក់សាំងកូវីដ-១៩ លើអ្នកដំណើរចូលស្រុក
កាលពីថ្ងៃទី ០៩ ខែមករា ឆ្នាំ ២០២៣ កន្លងទៅ រដ្ឋមន្ត្រីក្រសួងសុខាភិបាលថៃ បានប្រកាសលុបចោលវិធានការពិនិត្យលើកាតវ៉ាក់សាំងកូវីដ-១៩ នៃអ្នកដំណើរចូលក្នុងប្រទេស។
លោក Anutin Charnvirakul រដ្ឋមន្ត្រីក្រសួងសុខាភិបាល បានថ្លែងបញ្ជាក់ថា ការត្រួតពិនិត្យលើកាតចាក់វ៉ាក់សាំង គឺដូចជាមិនសមសោះ ហើយខាងក្រុមអ្នកជំនាញផ្នែកសុខាភិបាលក៏បានឯកភាពគ្នាដែរ ក្នុងការលុបចោលវិធានការថ្មីនេះ ដែលខាងអាជ្ញាធរនិយតករអាកាសចរណ៍ក្នុងប្រទេស បានប្រកាសអនុវត្តកាលពីចុងសប្ដាហ៍កន្លងទៅ ដើម្បីត្រៀមខ្លួនទប់ស្កាត់ជាមុន ក្រោយប្រទេសចិនបើកច្រកព្រំដែនវិញនោះ។
រដ្ឋមន្ត្រីក្រសួងសុខាភិបាលដដែល ក៏បានបន្ថែមទៀតថា ចំពោះអ្នកដំណើរដែលមិនបានចាក់វ៉ាក់សាំង ក៏អាចធ្វើដំណើរចូលប្រទេសខ្លួនបានដែរ ដោយគ្មានការហាមឃាត់អ្វីនោះឡើយ៕
