មកដល់ពេលនេះ វីដេអូរបស់អតីតតារាភាពយន្ត សុខ ស្រីមុំ ដែលបានប្រើពាក្យធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ ត្រូវបានចែករំលែកជាបន្តបន្ទាប់ បើទោះជាវីដេអូដើម ត្រូវបានលុបចោលទៅហើយក្តី។
ក្នុងនោះ មិនថាតែប្រជានុរាស្រ្តនោះទេ ដែលនាំគ្នាផ្ទុះប្រតិកម្មមិនពេញចិត្តនឹងសម្ដីទាំងនោះ តែគេក៏បានឃើញអ្នកនៅក្នុងរង្វង់សិល្បៈ បានសម្តែងការខកចិត្តយ៉ាងខ្លាំងដល់អ្នកស្រី សុខ ស្រីមុំ ដែលគ្រប់គ្នាចាត់ទុកថាជាតារារៀមច្បង តែបែរជាចេញមកបង្ហោះវីដេអូមិនដឹងខុសត្រូវបែបនេះទៅវិញ។
ជាក់ស្តែង ពិធីការិនីល្បីឈ្មោះ អ្នកនាង យុគ ចិន្តា ក៏បានបង្ហាញអារម្មណ៍ទទួលយកមិនបាននូវសម្តីធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ ពីសំណាក់ អតីតតារាភាពយន្ត សុខ ស្រីមុំ ដែរ ដោយអ្នកនាង បានបញ្ចេញមតិនៅក្រោមការបង្ហោះរបស់ អ្នកនាង ម៉េង កែវពេជ្ជតា ថា៖ «ខ្ញុំគោរព និង ឱ្យតម្លៃវីរសិល្បករខ្លាំងណស់ តែនៅពេលឃើញ បងស្រី សុខ ស្រីមុំ ប្រមាថព្រះចេស្តា ព្រះអង្គ និង សម្តេចម៉ែ ខ្ញុំពិតជាទទួលយកមិនបាន នៅពេលដែលបងស្រីធ្វើទង្វើបែបនេះ»៕
