ហេងៗលាភៗ! ថ្ងៃចូលឆ្នាំចិន បើបានញុំាអាហារ ៧ មុខនេះ ហេង សំណាង លាភ នឹងហូរចូលពេញមួយឆ្នាំ​បឹប

រៀងរាល់ឱកាសបុណ្យចូលឆ្នាំចិន អ្នកដែលជាប់សែស្រឡាយចិនតែងមិនភ្លេចឡើយនូវការរៀបចំមុខម្ហូបសម្រាប់សែនដូនតាដូចជា សម្លចាប់ឆាយ ខសាច់ជ្រូក និង ឆាមីសួ ជាដើម។ ទន្ទឹមនឹងអាហារសែនព្រេននេះដែរ ក៏មានអាហារ ៧ មុខ ដែលគេមានជំនឿតៗគ្នាថា បើបានបរិភោគនៅថ្ងៃចូលឆ្នាំ នឹងទទួលបានលាភសំណាងសម្រាប់ឆ្នាំថ្មី។ អាហារនាំលាភសំណាងទាំងនោះ សុទ្ធតែបង្កប់អត្ថន័យទៅតាមឈ្មោះ រូបរាង ក៏ដូចជារបៀបធ្វើរបស់វា។ អាហារទាំង ៧ មុខមានដូចជា៖

១. ត្រី

ពាក្យត្រីនៅក្នុងភាសាចិន គឺមានសំឡេងដូចទៅនឹងពាក្យរីកច្រើន ដែលសំដៅដល់ភាពចម្រុងចម្រើនភោគទ្រព្យ។ ហេតុដូចនេះ ទើបប្រជាជនចិនតែងកាន់ខ្ជាប់ការបរិភោគត្រីនៅក្នុងឱកាសថ្ងៃចូលឆ្នាំចិន។ គេជឿជាក់ថា បើពួកគេអាចសន្សំទ្រព្យនៅឆ្នាំចាស់បានច្រើនកាលណា នោះពួកគេនឹងអាចបង្កបង្កើនទ្រព្យបានកាន់តែច្រើនទៀតនៅឆ្នាំបន្ទាប់។ ត្រីគឺជាអាហារប្រពៃណីនាំលាភសំណាងនៅថ្ងៃចូលឆ្នាំចិន ដោយគេចម្អិនសម្រាប់អាហារពេលល្ងាចនៅថ្ងៃចូលឆ្នាំ។​ ក្នុងនោះត្រី Crucian Carp ជានិមិត្តសញ្ញានាំមកនូវសំណាងល្អសម្រាប់ឆ្នាំថ្មី ខណៈត្រី Mud Carp និង ត្រី Catfish នាំមកនូវទ្រព្យសម្បត្តិហូរចូលមហាសាល។ គេអាចចម្អិនត្រីទៅតាមវិធីផ្សេងៗគ្នាឬតាមចំណង់ចំណូលចិត្ត អាចជាស្ងោរ ចំហុយ ឬខ។ ជារួមការបរិភោគត្រីនៅថ្ងៃចូលឆ្នាំចិន គេជឿថានឹងនាំមកនូវភាពសម្បូរហូរហៀរផ្នែកទ្រព្យប្រាក់កាក់។

២. គាវ

រយៈពេលច្រើនជាង ១៨០០ ឆ្នាំ គាវត្រូវបានគេចាត់ទុកជាអាហារចិនបុរាណ ដែលមានប្រជាប្រិយភាពបំផុតសម្រាប់ទទួលទាននៅថ្ងៃចូលឆ្នាំចិន។ ដោយសាររូបរាងរបស់វាធ្វើប្រដូចទៅនឹងប្រាក់ចិនបុរាណ ហេតុនេះទើបប្រជាជនចិនជឿថា ការបរិភោគគាវនៅថ្ងៃចូលឆ្នាំនឹងអាចឱ្យពួកគេបង្កើតប្រាក់ចំណូលសម្បូរហូរហៀរនៅឆ្នាំថ្មី រួមទាំងសំណាងល្អផងដែរ។

៣. ចៃយ៉រ

ស្ថិតនៅក្នុងចង្កោមអាហារឌីមសាំ ចៃយ៉រគឺជាអាហារប្រពៃណីដែលគេនិយមទទួលទាននៅអំឡុងដើមឆ្នាំនៃពិធីបុណ្យចូលឆ្នាំចិន ពិសេសពេញនិយមបំផុតនៅចិនភាគខាងកើត។ ចៃយ៉រត្រូវបានគេចាត់ទុកជាមាស ដោយសារតែក្រោយពេលបំពង វាមានពណ៌សម្បុរ និង រូបរាងដូចទៅនឹងដុំមាស។ ដូចនេះការបរិភោគចៃយ៉រក្នុងថ្ងៃចូលឆ្នាំចិន គេមានជំនឿថានឹងនាំមកនូវភាពរីកចម្រើនផ្នែកភោគទ្រព្យ។

៤. នំចៀល

ពាក្យនំចៀលនៅក្នុងភាសាចិនគឺអត្ថន័យសំដៅដល់ភាពរីកចម្រើនពីមួយឆ្នាំទៅមួយឆ្នាំ ប្រជាជនចិនមានជំនឿថា អត្ថន័យនេះនឹងនាំមកនូវភាពជោគជ័យលើការសិក្សា អាជីពការងារ និង ភាពរីកចម្រើនក្នុងមុខរបររកស៊ីឥតឈប់ឈរ។ សូម្បីតែក្មេងៗក៏ឆាប់លូតលាស់ទាំងកម្ពស់ និង ប្រាជ្ញាផងដែរ។

៥. នំអ៊ី

នំអ៊ីគឺជាបង្អែមចម្បងតែងបង្ហាញវត្តមានជានិច្ចនៅគ្រប់ផ្ទះប្រជាជនចិនក្នុងថ្ងៃចូលឆ្នាំ។ ការទទួលទាននំអ៊ី ចិនមានជំនឿថានឹងនាំមកនូវភាពរីករាយនៅក្នុងក្រុមគ្រួសារ។

៦. មីទាញ

ដូចធ្លាប់បានឃើញ និង បរិភោគ មីទាញគឺមានប្រវែងជាងមីធម្មតា​ ហើយជាទូទៅនៅថ្ងៃចូលឆ្នាំ ប្រជាជនចិនតែងយកមកធ្វើអាហារបរិភោគដូចជា ឆា ស្រុសគោក និង ដាក់ក្នុងទឹកស៊ុបជាដើម។ សរសៃមីប្រវែងវែងនេះហើយដែលគេមានជំនឿថាបរិភោគនឹងនាំមកនូវអាយុវែង។

៧. ក្រូច

គ្រប់ពពួកក្រូចសម្បកពណ៌លឿង និង ពណ៌ទឹកក្រូច​ គឺតំណាងឱ្យមាស ដែលជានិមិត្តសញ្ញានៃទ្រព្យសម្បត្តិ និង ភាពសម្បូរសប្បាយ ហើយក៏នាំមកនូវសំណាងល្អផងដែរ។ ​ពាក្យក្រូចនៅក្នុងភាសាចិន គឺមានសំឡេងដូចទៅនឹងពាក្យជោគជ័យ ហើយក្នុងពាក្យនោះក៏មានអក្សរសំណាងភ្ជាប់មកជាមួយផងដែរ។ គេជឿថានៅពេលបរិភោគផ្លែក្រូចច្រើនកាលណា ទ្រព្យសម្បត្តិលុយកាក់នឹងហូរចូលមកកាន់តែច្រើនកាលនោះ៕

ប្រភព៖ chongqing