ទឹកជ្រោះផ្អោកគីរីវង់ ជារមណីយដ្ឋានដ៏ពេញនិយមមួយក្នុងខេត្តតាកែវ ដែលមានទីតាំងស្ថិតនៅភូមិជ្រោយស្លែង ឃុំគិរីចុងកោះ និង ភូមិត្រពាំងស្រង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ។
ទឹកជ្រោះផ្អោក មានប្រវែងប្រមាណជា ១០០០ ម៉ែត្រ និង ទទឹង ២ ម៉ែត្រ ដែលហូរពីលើភ្នំ ហើយកាត់ថ្មដាតូច-ធំ ចុះមកក្រោម និង មានផ្ទះស្បូវ សម្រាប់អង្គុយលេងកម្សាន្ត រួមទាំងមានលក់ម្ហូបអាហារដែលមានតម្លៃសមរម្យសម្រាប់ភ្ញៀវទេសចរណ៍ទៅកម្សាន្តផងដែរ។
អ្វីដែលកាន់តែពិសេសទៀតនោះ នៅមុនពេលទឹកជ្រោះផ្អោកក្លាយជារមណីយដ្ឋានពេញនិយម គឺកាលពីជាង ១០ ឆ្នាំមុន នៅទីនោះគឺជាទីតាំងសំខាន់ដែលមានប្រជាជនជាច្រើនមកជីករកត្បូងមានតម្លៃ ហើយត្បូងដែលសម្បូរជាងគេ មានដូចជា ត្បូងទឹកសមុទ្រ ត្បូងកញ្ចក់ ត្បូងផ្កាថ្ម ត្បូងមីសិល និង ត្បូងឃ្មុំ ជាដើម ប៉ុន្តែបច្ចុប្បន្នត្បូងនៅកន្លែងដែលប្រជាជនកំពុងលេងទឹកយ៉ាងសប្បាយបានខ្សត់ខ្សោយហើយ។
ដូច្នេះ ប្រសិនបើប្រិយមិត្តចង់ទៅកម្សាន្តសប្បាយនឹងទឹកជ្រោះធ្លាក់ពីលើភ្នំ ហើយសម្បូរព្រៃឈើ តូច-ធំ អមដោយថ្មដា និង ចង់ស្វែងយល់ពីត្បូងមានតម្លៃនៅទឹកជ្រោះផ្អោក ព្រមទាំងពិសាអាហារ ជាពិសេសបាញ់ឆែវដែលមានរសជាតិឆ្ងាញ់ពិសា អាចទៅកម្សាន្តនៅរមណីយដ្ឋានទឹកជ្រោះផ្អោកបាន៕
ប្រភព ៖ រដ្ឋបាលខេត្តតាកែវ
