ជាទូទៅ បុរសៗចូលដល់វ័យ ៣០ ឆ្នាំឡើង រមែងតែរៀបការមានគ្រួសារ អ្នកខ្លះថែមទាំងមានកូនពីរបីរួចបាត់ទៅហើយ។ ដោយឡែក បុរសវ័យខ្ទង់សាមមួយចំនួនទៀត ពួកគេហាក់មិនទាន់ចង់បញ្ចប់ភាពនៅលីវ ដោយហេតុមានរឿងសំខាន់មួយចំនួន ដែលពួកគេមិនទាន់បានបំពេញ ឬមិនទាន់គ្រប់គ្រាន់តាមអ្វីដែលចង់បាន។ យើងសូមលើកពីចំណុច ៥ យ៉ាង ដែលបុរសៗសុខចិត្តនៅលីវដល់វ័យខ្ទង់សាម លុះត្រាតែពួកគេបានធ្វើវាឱ្យសម្រចជាមុនសិន។
១. ស្ថិរភាពផ្នែកហិរញ្ញវត្ថុ
ភាគច្រើនបុរសវ័យ ៣០ ឆ្នាំឡើង មានបំណងចង់មានសុវត្ថិភាពផ្លូវចិត្តផ្នែកហិរញ្ញវត្ថុជាមុនសិន ទើបសម្រេចចិត្តរៀបការមានគ្រួសារ។ ពួកគេចង់ឱ្យគ្រឹះហិរញ្ញវត្ថុមានលំនឹងល្អ រាប់បញ្ចូលទាំងការសន្សំ ការវិនិយោគ ឬមានផ្ទះជារបស់ខ្លួន។ ពួកគេចង់មានអារម្មណ៍មានសមត្ថភាពផ្គត់ផ្គង់គ្រួសារ ដោយមិនខ្វល់ស្ត្រេសលើបញ្ហាហិរញ្ញវត្ថុ ហើយរីករាយនឹងរបៀបរស់នៅកាន់តែប្រសើរឡើង។
២. ជោគជ័យអាជីព
ពួកគេផ្តល់ភាពសំខាន់ទៅលើគោលដៅអាជីព ដូចជាការឡើងតួនាទីឬឡើងប្រាក់ខែ ឬរកស៊ីជោគជ័យ ដែលជាធម្មតាការឆ្ពោះទៅរកគោលដៅនេះ តម្រូវការផ្តោតខ្ពស់ និង ពេលវេលា។ កាលណាកសាងអាជីពជោគជ័យ វាអាចផ្តល់ឱ្យពួកគេនូវប្រយោជន៍រយៈពេលវែង ធ្វើឱ្យពួកគេមានអារម្មណ៍បានត្រៀមខ្លួនរួចរាល់សម្រាប់ជីវិតអាពាហ៍ពិពាហ៍។
៣. អភិវឌ្ឍន៍ផ្ទាល់ខ្លួន
ការអភិវឌ្ឍន៍ខ្លួនឯងជាស្នូលមួយដ៏សំខាន់សម្រាប់ភាពចាស់ទុំ និង ស្គាល់ខ្លួនឯងកាន់តែច្បាស់។ ក្នុងនោះរួមបញ្ចូលតាំងពីការស្វែងរកអ្វីដែលខ្លួនចូលចិត្ត រកឃើញភាពខ្លាំងរបស់ខ្លួន និង ប្រឡូកក្នុងសង្គមកាន់តែច្រើន…ជាដើម។
៤. ចង់មានជីវិតឯករាជ្យសិន
បុរសខ្លះចង់រីករាយជាមួយជីវិតឯករាជ្យឱ្យឆ្អែតឆ្អន់សិន។ ជីវិតដែលមានសេរីភាព សេរីភាពក្នុងការដើរកម្សាន្ត សាកល្បងអ្វីថ្មីៗ និង បទពិសោធថ្មីៗជាដើម។ ការប្រើជីវិតឯករាជ្យ អាចជួយឱ្យពួកគេស្គាល់ច្បាស់នូវអត្តសញ្ញាណរបស់ខ្លួន មុនពេលកសាងជីវិតជាមួយដៃគូ។
៥. កំពុងស្វែងរកដៃគូដ៏ត្រឹមត្រូវ
ល្អជាងប្រញាប់មានគ្រួសារ បុរសមួយចំនួនបានកំពុងចំណាយពេលដើម្បីស្វែងរកមើលនរណាម្នាក់ដែលច្បាស់លាស់ នរណាម្នាក់ដែលអាចរួមរស់ផ្តល់តម្លៃ ផ្តល់ក្តីស្រលាញ់ មានគោលដៅ និង បំណងប្រាថ្នាដូចគ្នាយ៉ាងពិតប្រាកដ។ ពួកគេជឿជាក់ទៅលើការភ្ជាប់គ្នាឱ្យបានស៊ីជម្រៅជាមុនសិន ដើម្បីធានាកសាងជីវិតរួមគ្នាប្រកបដោយភាពយូរអង្វែង៕
