តាមរយៈសកម្មភាពរួមការងារជាច្រើនទាំងការថតរឿង និង ថតវីដេអូខ្លីៗបង្ហោះលើបណ្ដាញសង្គម លោក វ៉ាន់ ដាវីដ និង កញ្ញា ហេង បូនីកា មិនត្រឹមឆក់បានការចាប់អារម្មណ៍ចំពោះដៃគូដ៏ស័ក្តិសមដែលមានទេពកោសល្យសម្ដែងបានយ៉ាងប៉ិនប្រសប់នោះទេ តែថែមទាំងអ្នកទាំងពីរមានភាពគួរឱ្យស្រឡាញ់ និង សមគ្នាខ្លាំង រហូតអ្នកគាំទ្រធ្លាប់ផ្គូរផ្គង់ចង់ឱ្យអ្នកទាំងពីរក្លាយជាគូស្នេហ៍ក្រៅឆាក។
លើសពីនេះ តារាសម្ដែងប្រុសស្រីមួយគូនេះ តែងធ្វើឱ្យអ្នកគាំទ្រចាប់អារម្មណ៍ខ្លាំង ក្រោយពីបានឃើញសកម្មភាពយ៉ាងស្និទ្ធស្នាលជាមួយគ្នា មិនត្រឹមតែក្នុងការងារទេ តែក៏ឃើញសកម្មភាពក្រៅឆាក ទាំងរូបភាព ក៏ដូចជាវីដេអូផ្សេងៗលើបណ្ដាញសង្គម មានកាយវិការផ្អែមល្ហែមលើសពីមិត្តធម្មតា ដែលធ្វើឱ្យអ្នកគាំទ្រគិតថាអ្នកទាំងពីរកំពុងសាងទំនាក់ទំនងស្នេហានឹងគ្នា។
ដ្បិតតែកន្លងមក ប្រុសសង្ហាស្រីស្អាត ដាវីដ និង បូនីកា ក៏មិនបានចេញមុខបញ្ជាក់ច្បាស់ៗថាត្រូវជាអ្វីនឹងគ្នាមែន ប៉ុន្តែពីមួយថ្ងៃទៅមួយថ្ងៃ អ្នកទាំងពីរកាន់តែផ្អែមល្ហែម ខណៈឃើញទៅណាមកណាតែងមានវត្តមានជាមួយគ្នាដណ្ដើរគ្នាយ៉ាងត្រសង។
ដោយឡែក មកដល់ថ្មីៗនេះ លោក វ៉ាន់ ដាវីដ និង កញ្ញា ហេង បូនីកា ក៏ដាច់ចិត្តនិយាយបកស្រាយក្នុងវីដេអូមួយពីទំនាក់ទំនងរបស់អ្នកទាំងពីរច្បាស់ៗ ដោយបញ្ជាក់ឱ្យដឹងថាអ្នកទាំងពីរ គឺពុំមែនជាសង្សារនឹងគ្នាទេ មានន័យថាសកម្មភាពផ្អែមល្ហែមរបស់អ្នកទាំងពីរកន្លងមកពុំមែនជាស្នេហាឡើយ គ្រាន់តែជាទំនាក់ទំនងពិសេសមួយ ដែលយល់ចិត្តស្និទ្ធស្នាល យកចិត្តទុកដាក់ ជួយទុក្ខធុរៈគ្នាទៅវិញទៅមកប៉ុណ្ណោះ៕
សូមចុចទីនេះដើម្បីទស្សនាវីដេអូ៖
