នៅតាមបណ្តាញសង្គមក្នុងប្រទេសចិន កំពុងផ្ទុះការចាប់អារម្មណ៍ទៅលើរឿងរ៉ាវរបស់នារីម្នាក់ ដែលសុខចិត្តចោលអាជីពជាអូតែស មកចិញ្ចឹមជ្រូកនៅស្រុក រហូតក្លាយជាថៅកែបានប្រាក់ចំណេញច្រើនជាងប្រាក់ខែរាប់ដង។
តាមព័ត៌មានបានឱ្យដឹងថា នារីរូបនេះមានវ័យ ២៨ ឆ្នាំ នាងធ្លាប់ធ្វើការជាមួយនឹងជើងហោះហើរយន្តហោះមកជាង ៥ ឆ្នាំ ដោយបានប្រាក់ខែខ្ពស់បំផុតប្រហែលជា ២០០០ ដុល្លារក្នុងមួយខែ។ លុះមកដល់ពេលជំងឺកូវីដ-១៩ រាតត្បាត ប្រាក់ខែនាងក៏ត្រូវក្រុមហ៊ុនកាត់បន្ថយនៅសល់តែប្រមាណជាង ៣៨០ ដុល្លារ ម្យ៉ាងទៀតសុខភាពឪពុកម្តាយនាងមិនសូវល្អ ទើបនាងក៏សម្រេចចិត្តលាលែងអាជីពនេះ ហើយត្រឡប់មកចិញ្ចឹមជ្រូកនៅឯស្រុកវិញ។
ក្នុងនោះ នាងបានបង្ហាញពីការចិញ្ចឹមជ្រូករបស់នាងទៅតាមបណ្តាញសង្គម រហូតមានមហាជនគាំទ្រយ៉ាងច្រើន ហើយនាងរកចំណូលបានច្រើនបំផុតរហូតដល់ជាង ២៧ ០០០ ដុល្លារ ក្នុងរយៈពេលត្រឹម ២ ខែ ដែលច្រើនជាងប្រាក់ខែនាងរាប់សិបដង។ នៅថ្ងៃអនាគត នាងនឹងមានគម្រោងពង្រីកកសិដ្ឋានបន្ថែម ព្រមទាំងនឹងធ្វើវាឱ្យក្លាយទៅជាកន្លែងដើរលេង ដែលអាចឱ្យនាងទាញចំណូលបានថែមទៀត៕
ប្រភព៖ Khaosod
