នឹកខ្លាំងពេក អ្នកគាំទ្រសម្រុកសួរលោក រ៉េតធី ដូណា ពីដំណឹង តាតា ជាប្អូនស្រី ក្រោយឃើញវីដេអូមួយបានបង្ហោះ

បើរំឭកកាលពីអំឡុងឆ្នាំ ២០០០ និង ២០០០ ជាងមក មហាជនអ្នកគាំទ្រវិស័យចម្រៀង ជាពិសេសផលិតកម្ម​ U2 និង ផលិតកម្មសាន់ដេ ច្បាស់ជានៅចាំនៅឡើយតារាចម្រៀងស្រី តាតា ម្ចាស់បទ «មិនអាចខ្វះនរណាម្នាក់» បទ «ដើរវ៉ៃគេ» និង បទជាច្រើនទៀត។

យ៉ាងណាមិញ បើគិតមកដល់ពេលនេះរយៈពេលប្រមាណ ២០ ឆ្នាំមកហើយ ដែលកញ្ញា តាតា បានបាត់វត្តមានលើវិថីសិល្បៈ ប៉ុន្តែកាលអំឡុងឆ្នាំ ២០១៨ កន្លងទៅ គេបានឃើញនាងម្តងដែរក្នុងកម្មវិធីខួបកំណើតលោក រ៉េតធី ដូណា ដែលជាបងប្រុសបង្កើត។

ងាកទៅកាន់បណ្តាញសង្គមហ្វេសប៊ុកឯណោះវិញ បើទោះជាកញ្ញា តាតា បានបង្ហោះរូបភាពជារឿយៗលើគណនីផ្ទាល់ខ្លួនក៏ពិតមែន ប៉ុន្តែអ្នកគាំទ្រដូចជាមិនបានដឹងពីសុខទុក្ខរបស់នាងច្បាស់លាស់នោះឡើយ។ ឯចំពោះរាល់រូបភាពដែលនាងបានបង្ហោះឡើងគឺមើលទៅដូចជារូបតុក្កតាបន្តិច រូបនាងបន្តិច។

ដោយឡែក ថ្មីៗនេះ អ្នកលេងបណ្តាញសង្គមហ្វេសប៊ុកបានចូលទៅបញ្ចេញមតិនៅលើការផុសរបស់លោក រ៉េតធី ដូណា ដែលជាបងប្រុសបង្កើតរបស់កញ្ញា តាតា បន្ទាប់ពីតន្ត្រីកររូបនេះ បានបង្ហោះវីដេអូចម្រៀងរបស់កញ្ញា ប្រេម៉ា cover បទរបស់កញ្ញា តាតា មកច្រៀង។

ក្នុងនោះ មានអ្នកគាំទ្រម្នាក់បានខមមិនថា ៖ «នឹកបងស្រី តាតា ណាស់ពូ ពូជាបងប្រុសបង្កើតបង តាតា ម៉េចអត់ដែលប្រាប់ពីដំណឹងចែ តាតា ខ្ញុំស្រឡាញ់ និង គាំទ្រចែ តាតា ណាស់»។ យ៉ាងណាមិញ សំណួរនេះដែរ លោក រ៉េតធី ដូណា ក៏មិនបានឆ្លើយតបនោះដែរ៕