ទំនាយតាមថ្ងៃសង្ក្រាន្តទាំង ៣ ថ្ងៃក្នុងឆ្នាំម្សាញ់ ២០២៥ នេះ មានមន្រ្តីរាជការ ឧកញ៉ា អ្នកធំ អាចប្រទះបញ្ហា ឬខូចបុណ្យស័ក្ដិ

ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នឹងឈានចូលមកដល់នៅវេលាទៀបភ្លឺ ថ្ងៃច័ន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ០៤ និង ៤៨ នាទីទៀបភ្លឺ។

តាមសៀវភៅមហាសង្ក្រាន្ត ដែលរៀបរៀងដោយឯកឧត្ដម អ៊ឹម បុរិន្ទ អគ្គលេខាធិការរង គណៈកម្មការជាតិរៀបចំបុណ្យជាតិ និង អន្តរជាតិ គណៈកម្មការស្រាវជ្រាវវិជ្ជាហោរាសាស្ត្រ និង ប្រពៃណីទំនៀមទម្លាប់ខ្មែរ បានបង្ហាញអំពីទំនាយតាមថ្ងៃសង្ក្រាន្តនៃឆ្នាំថ្មី ឆ្នាំម្សាញ់ សប្តស័ក ដូចខាងក្រោម ៖

១. ទំនាយថ្ងៃមហាសង្ក្រាន្ត ៖ ចូលឆ្នាំត្រូវនឹងថ្ងៃច័ន្ទ ទំនាយថាឆ្នាំនេះនឹងចាញ់សេនាបតី អ្នកធំ ឧកញ៉ា លោកជំទាវទាំងឡាយ (ចាញ់មានន័យថា ខូចបុណ្យស័ក្តិ អន់រាសី មានវិបត្តិ)។ ភ្លៀងនឹងមានដើមឆ្នាំស្រូវអង្ករល្អណាស់ តែមនុស្សនៅជួបផលលំបាកឱ្យក្រែងប្រយ័ត្នក្សត្រ និង មន្ត្រី ជំទាវខុណ្ណាងធ្វើអាក្រក់ធ្វើបាប នឹងកើតមានការតស៊ូរើបម្រះ មនុស្សនឹងកើតជំងឺតម្កាត់ច្រើន។

២. ទំនាយថ្ងៃវ័នបត ៖ ត្រូវនឹងថ្ងៃអង្គារ ទំនាយថាឆ្នាំនេះស្លាម្លូរស្រូវ អង្ករ ត្រី សាច់នឹងថ្លៃ អាមាត្យ មន្ត្រី នឹងខូចបុណ្យស័ក្តិ ឬ ត្រូវក្តៅក្រហាយចិត្តយ៉ាងច្រើន។

៣. ទំនាយថ្ងៃឡើងស័ក ៖ ត្រូវនឹងថ្ងៃពុធ ទំនាយថាឆ្នាំនេះរាជបណ្ឌិត បរោហិត អាចារ្យហោរា នឹងមានសេចក្តីសុខសម្រាន្តជាអនេក ប៉ុន្តែមានដង្កូវ ក្រាស៊ីស្រូវ។

គួរឱ្យដឹងដែរថា សម្រាប់ឆ្នាំថ្មីនេះ ទេវធីតា ដែលនឹងយាងមកគ្រប់គ្រងជម្ពូទ្វីបមនុស្សលោក ជាមគ្គនាយិកាព្រះនាម គោរាគទេវី ជារាជបុត្រីទី ២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ស អភរណៈ កែវមុក្តា ភក្សាហារទ្រង់តេលំ (ប្រេង) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ៕