ចំពោះកូនប្រុសទី ២ របស់កំពូលតារាចម្រៀងឧកញ៉ា ព្រាប សុវត្ថិ គឺលោក សុវត្ថិ មុនីនាគ ដែលមានឈ្មោះថ្មីបែបបរទេសហៅថា N.Jonh ត្រូវបានគេដឹងថាលោកកំពុងរៀនហ្វឹកហាត់លើវិស័យចម្រៀងបរទេស ក្នុងស្ថាប័នមួយនៅឯសហរដ្ឋអារិកជាង ១ ឆ្នាំហើយ។
ដោយឡែក ថ្មីៗកន្លងទៅនេះ ស្របពេលកំពុងហ្វឹកហាត់ផ្នែកចម្រៀងបរទេស និង ត្រៀមចេញចម្រៀងថ្មីៗ N.Jonh ក៏ត្រូវបានមហាជនលើបណ្ដាញសង្គមផ្ទុះបញ្ចេញមតិវែកញែកខ្លាំង ក្រោយឃើញតារាចម្រៀងរូបនេះបញ្ចេញ Teaser MV ចម្រៀង «Sweet Love» ដែលមហាជនភាគច្រើនរិះគន់មិនពេញចិត្ត ព្រោះលោកបញ្ចេញចម្រៀងនេះខុសពេលវេលា ខណៈប្រទេសជាតិកំពុងមានបញ្ហាសង្គ្រាមដោយសារការឈ្លានពានរបស់ថៃ។
ក្រោយឃើញតារាចម្រៀង N.Jonh រងការវែកញែករិះគន់ម្ដងហើយម្ដងទៀត ក៏ឃើញមានអ្នកសិល្បៈ ក៏ដូចជាមហាជនអ្នកគាំទ្រមួយចំនួន បានចែករំលែកជាមតិលើកជាហេតុផលមួយឡើង ដើម្បីឱ្យមហាជនជួយយោគយល់ដល់តារាចម្រៀងប្រុសរូបនេះ។
ក្នុងការចែករំលែកនូវហេតុផលនោះ ត្រូវគេបានលើកមកបកស្រាយថា ៖ «សុំនិយាយរឿង N•John កូនប្រុសពូសុវត្ថិបន្តិច។ ខ្ញុំបានឮមកថា Acc & Page របស់គាត់ បរទេសជាអ្នកកាន់ ដូច Kpop អ៊ីចឹង។ គាត់នៅផ្ដោតរៀនហ្វឹកហាត់ក្នុងស្ថាប័នបរទេសមួយហ្នឹង ដូច្នេះគាត់ស្ថិតនៅក្រោមការគ្រប់គ្រងរបស់គេ។ គ្រប់ Vìdeo ទាំងអស់ ត្រូវបាន Schedule គឺតម្រូវឱ្យ Release តែម្ដង។ ពេលគាត់បានល្បីល្បាញគេស្គាល់ពាសពេញ ក៏អាចជួយលើកស្ទួយមុខមាត់ប្រទេសយើងផងដែរ។ អ៊ីចឹងសូមអ្នកទាំងអស់គ្នា Understand him ផងចុះណា៎ ខ្មែរស្រឡាញ់ខ្មែរ ប្រឹងបន្តទៀត Bro @n.johnworld N.JOHN»។
លើសពីនេះ ក៏មានការលើកឡើងពីសកម្មភាពលើបណ្ដាញសង្គមរបស់តារាចម្រៀងប្រុស N.Jonh ដ្បិតតែកំពុងស្ថិតនៅក្រៅប្រទេសមែន ប៉ុន្តែរូបលោកក៏បានប្រើសំឡេងរបស់លោកជួយផ្សព្វផ្សាយពីការពិតនៃកម្ពុជា ដែលប្រឆាំងតតាំងនឹងការឈ្លានពានរបស់ថៃកន្លងមក តាមរយៈការបង្ហោះសារ និង ចេញជាចម្រៀងខ្លីៗផងដែរ៕
