ប្រិយមិត្តដែលជាអ្នកនិយមប្រើប្រាស់បណ្ដាញសង្គមហ្វេសប៊ុក ប្រាកដជាបានស្គាល់វេជ្ជបណ្ឌិតវ័យក្មេង ហ៊ាង រតនា មិនខាន ដោយកន្លងមក លោកវេជ្ជ. តែងចែករំលែកពីចំណេះដឹងនានាពាក់ព័ន្ធនឹងសុខភាពទាំងមនុស្សចាស់ និង កូនក្មេង ជាពិសេសនោះ លោកវេជ្ជ. ក៏ត្រូវគេដឹងថា លោកមានជំនាញក្នុងការព្យាបាលកុមារតូចៗផងដែរ។
ជាការពិត កាលពីថ្ងៃទី ១៧ ខែមីនា ឆ្នាំ ២០២៥ កន្លងទៅ លោកវេជ្ជ. ហ៊ាង រតនា បានបង្ហោះវីដេអូមួយ ខណៈកំពុងពិគ្រោះជាមួយម្ដាយរបស់កុមារតូចដែលមានជំងឺហើយបានមកព្យាបាលនៅមន្ទីរពេទ្យរបស់លោក។ ក្នុងខ្លឹមសារជជែកគ្នានោះ លោកវេជ្ជ. និង ម្ដាយរបស់អ្នកជំងឺបាននិយាយគ្នាពីប្រធានបទ ការបំបៅកូនដោយទឹកដោះម្ដាយ និង ការបំបៅកូនដោយទឹកដោះគោ ដែលក្នុងនោះលោក វេជ្ជ. ក៏បានឆ្លៀតបញ្ជាក់បន្ថែមនៅលើ Caption ថា ៖ «គាត់ថាពេទ្យនៅថៃ គេហាមមិនឱ្យក្មេងមឹមទឹកដោះគោតែម្តង ហើយមួយទៀតគេឱ្យឆុងទឹកដោះគោជាមួយទឹកក្តៅ ដែលចំណុចនេះខ្ញុំនិយាយដដែលៗច្រើនឆ្នាំហើយ តែនៅតែឃើញទម្លាប់ម្តាយឪពុកនៅតែបន្តឆុងទឹកដោះគោកូនជាមួយទឹកបរិសុទ្ធ ទឹកត្រជាក់ទៀត»។
បន្ទាប់ពីការផុសវីដេអូនេះហើយ ឃើញថានៅលើទំព័រផេករបស់លោកវេជ្ជបណ្ឌិត ក៏មានការបញ្ចេញយោបល់ជាច្រើន ដែលក្នុងនោះមានទាំងមតិយល់ស្រប និង មតិមួយចំនួនបានលើកឡើងតាមការយល់ឃើញរៀងៗខ្លួន ហើយក្នុងនោះក៏មានមតិមួយលើកឡើងថា «ប្រាប់ទៅទទួលបានមកវិញ កូនគេមឹមពេញប្រទេសងាប់អស់ហើយមែន?»។
ជាការឆ្លើយតបនឹងមតិនេះ លោកវេជ្ជបណ្ឌិត ហ៊ាង រតនា ក៏បានបង្ហោះសារថ្មីមួយទៀតថា ៖ «ថ្នាំល្វីងតែអាចព្យាបាលជំងឺ សម្ដីស្មោះទាស់ត្រចៀក ខ្ញុំមិនមែនចង់បន្ទោសបង្អាប់កូនដែលបៅទឹកដោះគោទេ ខ្ញុំគ្រាន់តែចង់ចែករំលែកអ្វីដែលល្អ បើយល់ថាល្អបងប្អូនធ្វើតាមទៅ បើយល់ថាមិនល្អបងប្អូនអូសរំលងទៅ ឬមកតវ៉ាមកបើគិតថាអ្វីដែលខ្ញុំនិយាយវាខុស។ ខ្ញុំមិននិយាយតម្រូវចិត្តបងប្អូនទេ ខ្ញុំចេញមកនេះគឺមកកែទម្លាប់ខុសឆ្គងជាច្រើនរបស់ប្រជាពលរដ្ឋយើង ខ្ញុំមិនចង់បានការសរសើរ ឬដើម្បីផ្គាប់ចិត្តបងប្អូននោះទេ»៕ សូមចុចទីនេះ ដើម្បីទស្សនាវីដេអូ ៖
