នៅថ្ងៃទី ១៥ ខែឧសភា ឆ្នាំ ២០២៥ វេលាម៉ោង ១៣:៥៧ នាទី មានករណីគ្រោះថ្នាក់ចរាចរណ៍មួយ កើតឡើងត្រង់ចំណុចមុខក្រសួងវប្បធម៌ និង វិចិត្រសិល្បៈ សង្កាត់ទន្លេបាសាក់ ខណ្ឌចំការមន រាជធានីភ្នំពេញ បង្កឡើងដោយរថយន្តម៉ាក LEXUS RX400H បុករះម៉ូតូកង់បីចំនួន ០៣ គ្រឿង ម៉ូតូ ០១ គ្រឿង និង រថយន្ត ០១ គ្រឿង ដែលបង្កឱ្យមានមនុស្សស្លាប់ ០១ នាក់ រងរបួសធ្ងន់ ០២ នាក់ និង រងរបួសស្រាល ០៣ នាក់។
ក្រោយហេតុការណ៍គ្រោះថ្នាក់ ដែលបណ្ដាលឱ្យមានមនុស្សស្លាប់ចំនួនម្នាក់នេះ ត្រូវបានគេស្គាល់អត្តសញ្ញាណថាជាបុរស ដែលជាអ្នករត់កង់បីមួយរូប ដែលក្រោយកើតហេតុ សពត្រូវបានក្រុមគ្រួសារបញ្ជូនទៅធ្វើបុណ្យតាមប្រពៃណីនៅគេហដ្ឋាន។ ក្នុងនោះយុវតីដែលត្រូវជាកូនស្រីជនរងគ្រោះដែលបានបាត់បង់ជីវិត មានគណនីឈ្មោះ DA MoNika បានសម្រក់ទឹកភ្នែកបង្ហោះសាររៀបរាប់ទាំងក្ដីឈឺចាប់ នៅថ្ងៃទី ១៦ ខែឧសភា ឆ្នាំ ២០២៥ នេះថា ៖ «បេះដូងកូនខ្ទេចខ្ទីអស់ហើយ ប៉ាសង្ហាណាស់ ប៉ាមិនព្រមនៅជាមួយកូនឱ្យយូរជាងនេះ។ យប់ហ្នឹងប៉ាឃ្លាតឆ្ងាយរហូតហើយ លែងវិលវិញហើយ ប៉ាផុតទុក្ខហើយ កូនសូមឧទ្ទិសកុសលឱ្យប៉ាបានទ្បើងឋានសួគ៌ សូមឱ្យប៉ាឆាប់បានចាប់ជាតិជាមនុស្សសាថ្មី សូមឱ្យប៉ាអាយុវែង ១០០ ឆ្នាំ។ កុំបារម្ភពីកូនអី កូននឹងមើលថែម៉ាក់ និង ប្អូនៗបន្តទៀត»។
អ្វីដែលកាន់តែរំជួលចិត្តទៀតនោះ ក្រោយទទួលដំណឹងថាឪពុកបានជួបគ្រោះថ្នាក់ ស្ត្រីដែលជាកូនច្បងរូបនេះ បានរៀបរាប់អំពីឪពុកជាទីស្រឡាញ់ទាំងក្ដីឈឺចាប់ថា ៖ «ប៉ាខ្ញុំសុខភាពល្អណាស់ ខំប្រឹងរកលុយជួយគ្រួសារ អត់ពីប៉ាទៅ តើគ្រួសារយើងទៅជាយ៉ាងណា។ ខ្ញុំស្រលាញ់ប៉ាស្មើជីវិត ហេតុអ្វីក៏អ្នកបើកបរគ្មានទំនួលខុសត្រូវ មកកាត់ផ្តាច់ជីវិតប៉ាខ្ញុំទាំងមិនដឹងខ្លួន»៕
