នាពេលថ្មីៗនេះ Cambodia Book Fair បានជូនដំណឹងអំពីកម្មវិធីពិព័រណ៍សៀវភៅ ដើម្បីអបអរសាទរទិវាជាតិអំណាន លើកទី ១០ ឆ្នាំ ២០២៥ ស្ថិតក្រោមប្រធានបទ «ការអានផ្សារភ្ជាប់អន្តរជំនាន់មនុស្សក្នុងសង្គម» ដែលនឹងធ្វើឡើងនៅថ្ងៃទី ០៨-០៩-១០-១១ ខែមីនា ឆ្នាំ ២០២៥ នៅឯវិទ្យាស្ថានបច្ចេកវិទ្យាកម្ពុជា (សាលាតិចណូ) ចាប់ពីម៉ោង ៨:០០ នាទីព្រឹក ដល់ម៉ោង ៨:០០ នាទីយប់។
Cambodia Book Fair បានឱ្យដឹងថា ក្នុងឆ្នាំនេះដែរ ទិវាជាតិអំណានលើកទី ១០ ឆ្នាំ ២០២៥ នឹងនាំមកនូវសៀវភៅរាប់ម៉ឺនក្បាល ជាមួយនឹងកំណើននៃស្តង់ពិព័រណ៍មកពីសា្ថប័នផ្សេងៗជាច្រើន។ អ្វីដែលកាន់តែពិសេសទៀតនោះ សម្រាប់អ្នកស្នេហាលើវិស័យការអាន ដែលមានបំណងចង់ជួបអ្នកនិពន្ធក្នុងដួងចិត្ត គឺជាឱកាសដ៏ល្អតែមួយគត់ដែលបងប្អូនមិនគួររំលង។
លើសពីនេះទៀតនោះ ទិវាជាតិអំណានលើកទី ១០ ឆ្នាំ ២០២៥ នឹងមានសកម្មភាពជាច្រើន រួមមានកន្លែងថតរូបស្អាតៗ ការលេងល្បែងកម្សាន្តសប្បាយៗ ការលេងហ្គេមដើម្បីឈ្នះរង្វាន់ ការគូរគំនូរ ផាត់ពណ៌សម្រាប់កុមារតូចៗនៅសួនកុមារ ការប្រគំតន្រ្តី និង ការបង្ហាញសមត្ថភាពសម្តែងផងដែរ៕
ប្រភព ៖ Cambodia Book Fair
