ជាមួយម៉ាកសម្លៀកបំពាក់ LE THANH HOA នេះគឺជាការបង្ហាញខ្លួនជាថ្មីម្តងទៀតរបស់ កញ្ញា អ៊ិន លក្ខិណា ខណៈមួយរយៈមុន នាងធ្លាប់បានដើរបង្ហាញម៉ូដឱ្យម៉ាកនេះជាមួយ កញ្ញា ប៊ី សុធារី។
បង្ហាញម៉ូដលើកនេះ អ៊ិន លក្ខិណា លេចធ្លោកាន់ខ្លាំង ដោយគ្រងឈុតមានលក្ខណៈហ្វេហ្សិនលំដាប់ខ្ពស់ ប្រកបដោយប្រណីតភាព និង ភាពច្នៃប្រឌិត។ ជាក់ស្តែង នៅក្នុងព្រឹត្តិការណ៍បង្ហាញម៉ូដ Aquafina Vietnam International Fashion Week 2025 ដែលធ្វើឡើងពីថ្ងៃទី ៥-៨ ខែមិថុនានេះ នាងបានគ្រងរ៉ូបខ្លីត្រឹមភ្លៅ ដែលលើតួរ៉ូបមានឌិនដោយត្បូងពណ៌ប្រាក់ ម៉ូដជាខ្សែបន្ទាត់ទទឹងៗ ហើយនៅត្រង់ភ្លៅមានលេងម៉ូដជាខ្សែចាក់ ទម្លាក់សងខាង មើលមកហាក់អណ្តែតលើដងខ្លួន និយាយរួម សាមញ្ញ តែលេចធ្លោ ហើយហ្វេហ្សិនឡូយខ្លាំង។
ជាមួយខូឡិកហ្សិននេះដែរ បើតាមម៉ាក LE THANH HOA បង្ហោះនៅលើទំព័រហ្វេសប៊ុក វាគឺជាខនសិប THE LIGHT OF WATER ឬប្រែថាពន្លឺនៃទឹក។ ពីមួយឈុតទៅមួយឈុត ពិតជាបង្ហាញពីភាពរស់រវើក ភាពច្នៃប្រឌិត តិចនិច សិល្បៈ និង ការលម្អិតគ្មានកន្លែងទាស់។
ម៉ាក LE THANH HOA មានភាពល្បីល្បាញខ្លាំងនៅវៀតណាម ហើយសិល្បៈច្នៃម៉ូដរបស់ម៉ាកក៏បានឆ្ពោះទៅដល់កម្រាលព្រំក្រហមសកលជាច្រើនផងដែរ។ រីឯស្ថាបនិករបស់ម៉ាក គឺ លោក Le Thanh Hoa ជាជនជាតិវៀតណាម៕
