កន្លងមកមហាជនអ្នកគាំទ្រកំពូលតារាចម្រៀងរ៉េប វណ្ណដា ច្បាស់ជាបានជ្រាបមកហើយ ពីភាពល្បីល្បាញក្នុងការផលិតចម្រៀងក្នុងវិស័យឧស្សាហកម្មតន្ត្រីរ៉េប។ លើសពីនោះ មិនត្រឹមតែជាតារាចម្រៀងរ៉េប តែ វណ្ណដា ក៏ត្រូវបានចាត់ទុកជាតារាចម្រៀងគំរូមួយរូប ដែលមានតារាចម្រៀងរ៉េបស្រករមុន ស្រករក្រោយជាច្រើនទៀត រៀនសូត្រតាមក្នុងវិស័យចម្រៀងនេះ។
ជាក់ស្តែង ក្រឡេកទៅមើល លោក មេសា ដែលត្រូវបានគេស្គាល់ថា ជាជំនួយការរបស់លោក វណ្ណដា ផ្ទាល់វិញនោះ ក៏មានឱកាសក្នុងការបង្ហាញសមត្ថភាពក្នុងវិស័យចម្រៀងរ៉េប ដោយលោកត្រូវបានហ្វឹកហាត់ និង បង្រៀនពីលោក វណ្ណដា ផ្ទាល់។
កាលពីអំឡុងខែកុម្ភៈ ឆ្នាំ ២០២៤ កន្លងទៅ មេសា បានបញ្ចេញបទចម្រៀងដំបូងរបស់លោក ដោយបកស្រាយរួមគ្នានឹងលោក វណ្ណដា មានចំណងជើងថា «ដូចមេ» ទទួលបានការគាំទ្រយ៉ាងខ្លាំងពីយុវវ័យ។
ដោយឡែក ក្រោយរយាលនៃការចេញចម្រៀង និង សំងំហ្វឹកហាត់បន្ថែមមួយរយៈ ថ្មីៗនេះ លោក មេសា ក៏បានបញ្ចេញចម្រៀងថ្មីមួយបទទៀតហើយមានចំណងជើងថា «អត់ពន្ធ» ដែលកំពុងផ្ទុះការចែករំលែកជាបន្តបន្ទាប់លើបណ្តាញសង្គមនានា។
ក្នុងនោះ ចម្រៀងថ្មីរបស់លោក មេសា លើកនេះ មានការបកស្រាយតែម្នាក់ឯងដោយគ្មានតារាចម្រៀងរ៉េប វណ្ណដា ក៏ពិតមែន ប៉ុន្តែក្រឡេកទៅមើលការផលិតវិញ គឺមានលោក វណ្ណដា ជា Producer ព្រមទាំងជួយជាច្រើនផ្នែកទៀតនៃចម្រៀងនេះ៕
សូមចុចទីនេះ ដើម្បីទស្សនាវីដេអូ៖
