ស្ងាត់លើបណ្តាញសង្គមមួយរយៈ ឥលូវនេះ លីនដា កូនស្រីអភិជនជាន់ខ្ពស់ បានបង្ហាញមុខជាថ្មី ធ្វើឱ្យផ្ទុះការចាប់អារម្មណ៍ជាខ្លាំង។ ជាក់ស្តែង កាលពីម្សិលមិញ នាងបានចូលរួមកម្មវិធីរាត្រីសមោសរបស់ម៉ាកគ្រឿងអលង្ការល្បីលំដាប់ពិភពលោកគឺ BVLGARI ដែលធ្វើឡើងនៅប្រាសាទបាយ័ន ទឹកដីខេត្តសៀមរាប។ ខុសសព្វមួយដង ដែលចូលចិត្តលេងខ្លួនជាមួយសម្លៀកបំពាក់ប្រ៊េនៗ ដោយឡែកលើកនេះ លីនដា បានគ្រងឈុតប្រណីតមានរំលេចក្បាច់ខ្មែរយ៉ាងច្បាស់ ធ្វើឱ្យភ្ញៀវចូលរួមទាំងខ្មែរ និង បរទេស មានការចាប់អារម្មណ៍ខ្លាំង។
ជាក់ស្តែង មិនចាញ់តារាបរទេស លីនដា ពិតជាស្រស់ស្អាតលេចធ្លោគ្មានកន្លែងទាស់។ នាងបានស្លៀករ៉ូបពណ៌មាសវែងអូសដី សំពត់ម៉ូដឆែកត្រឹមភ្លៅជាសាច់ភ្លឺផ្លេក។ ចំណែកអាវរចនាបែបលោហៈពណ៌មាសភ្លឺរលោង ជាពិសេស ត្រង់ជាយអាវខាងលើមានរំលេចម៉ូដជាក្បាច់ខ្មែរ ទំនងដកស្រង់ពីក្បាំងមកុដ មើលមកសហសម័យ អេឡហ្គង់ និង ស៊ីវិល័យបំផុត។
បន្ថែមភាពទាក់ទាញស៊ីមេទ្រីនឹងប្រ៊េនផងនោះ លីនដា បានប្រើគ្រឿងលម្អដូចជា ខ្សែក ក្រវិល ចិញ្ចៀន កងដៃ និង កាបូបម៉ាក BVLGARI ផងដែរ។ មួយគួរចាប់អារម្មណ៍ទៀតនោះ សូម្បីតែស្បែកជើងកែងពណ៌មាសរបស់នាង ក៏មានរំលេចក្បាច់ភ្ញីយ៉ាងប្រណីត។ លីនដា លេងឈុតនេះជាពីរស្ទាយ៌ ដោយមានប្រើក្រណាត់ភ្លឺរលោងវែងអូដី ធ្វើជាម៉ូដអាវមួយជាន់ទៀត៕
