ប៉ះធ្មេញហើយ ១ ខែ ពិនិត្យឃើញមានផ្ទៃពោះ មានអីនាំប្ដីទៅអុកឡុកទារថ្លៃសំណងពីពេទ្យ ចុងក្រោយធ្លាយការពិតខ្ទេច

សារព័ត៌មាន HK01 បានរាយការណ៍ពីករណីដ៏គួរឱ្យហួសចិត្តមួយនៅប្រទេសចិន ដែលមានស្រ្តីម្នាក់បាននាំប្តីទៅអុកឡុកពេទ្យធ្មេញ ដើម្បីទាមទារសំណង ដោយចោទថាខ្លួនមានកូន ដោយសារតែប៉ះធ្មេញ។

តាមព័ត៌មានបានឱ្យដឹងថា គូប្តីប្រពន្ធមួយគូនេះបាននាំគ្នាទៅគ្លីនិកធ្មេញមួយកន្លែង ហើយនិយាយចោទថាខ្លួនមានកូន ក្រោយពីការប៉ះធ្មេញនៅមន្ទីរពេទ្យនេះកាលពីមួយខែមុន។ ខាងពេទ្យធ្មេញពិតជាហួសចិត្តខ្លាំងណាស់ ហើយក៏បានព្យាយាមប្រកែកថាវាមិនអាចទៅរួច តែគូប្តីប្រពន្ធមួយនេះនៅតែខំប្រកែក ហើយស្រ្តីជាប្រពន្ធក៏ទាមទារឱ្យខាងពេទ្យធ្មេញចេញថ្លៃពិនិត្យរាងកាយរបស់ខ្លួន តែខាងពេទ្យធ្មេញមិនព្រមចេញឱ្យ រួចគំរាមហៅប៉ូលិស ទើបគូប្តីប្រពន្ធមួយនេះនាំគ្នាងើបដើរចេញពីពេទ្យបាត់ទៅ។

យ៉ាងណាមិញ រឿងរ៉ាវមួយនេះទទួលបានការរិះគន់ខ្លាំងណាស់ពីសំណាក់មហាជននៅតាមបណ្តាញសង្គម ដោយម្នាក់ៗមិននឹកស្មានថាមានមនុស្សចេះរកនឹករឿងដូច្នេះមកដើរចោទរករឿងគេ ប៉ុន្តែមិនយូរប៉ុន្មានខាងគ្លីនិកធ្មេញក៏បានចេញមុខបកស្រាយ​ឱ្យដឹងថា តាមពិតទៅនេះគឺជាការសម្តែង ដែលខាងគ្លីនិកប្រឌិតឡើងប៉ុណ្ណោះ វាមិនមែនជាការពិតនោះទេ៕

ប្រភព៖ Sanook