ទឹកជំនន់ផង ស្រុតដីផង ហើយគ្រាន់តែម្សិលមិញនេះ នៅបាងកកមានភ្លើងឆេះ ៤ ករណីជាប់ៗគ្នា អ្នកពន្លត់រត់ចែកជើងគ្នាវិលក្បុង

មួយរយៈក្រោយនេះ គេសង្កេតឃើញថាប្រទេសថៃ ហាក់ដូចជាប្រទះករណីអគ្គិភ័យផ្ទួនៗគ្នាញឹកញាប់ណាស់ ជាក់ស្តែងកាលពីថ្ងៃទី ២៥ កន្លងទៅនេះ មានករណីអគ្គិភ័យមិនតិចជាង ៤ ករណីនោះទេ ដែលបានកើតឡើងនៅក្នុងទីក្រុងបាងកក។

តាមរយៈផេក Fire and Rescue Thailand បានឱ្យដឹងថា ករណីទីមួយ បានកើតឡើងទៅលើអគារដែលគេបោះបង់ចោលនៅផ្លូវចម្រើនក្រុង សង្កាត់បាងរ៉ាក់ ខណ្ឌបាងរ៉ាក់ នៅម៉ោងប្រហែល ៣ ល្ងាច រីឯករណីទីពីរបានកើតឡើងនៅលើផ្ទះអ្នកភូមិ នៅលើផ្លូវសុខុមវិត សង្កាត់បាងណាតៃ ខណ្ឌបាងណា នាម៉ោងប្រហែល ៦ ល្ងាច លុះមកដល់ម៉ោង ៧ យប់ ករណីទីបី ក៏បានកើតឡើងនៅលើផ្ទះអ្នកភូមិមួយទៀត នៅលើផ្លូវអីសារ៉ាក់ផាប សង្កាត់បាងកកយ៉ៃ ហើយចុងក្រោយបង្អស់ គឺនៅម៉ោងប្រហែល ១ អធ្រាត្រ អគ្គិភ័យក៏បានឆាបឆេះអគារលក់ដូរមួយកន្លែងនៅលើផ្លូវឡាត់ផ្រាវ ខណ្ឌឡាត់ផ្រាវ ដែលបង្កឱ្យការខូចខាតយ៉ាងធ្ងន់ធ្ងរ។

យ៉ាងណាមិញ ខាងអ្នកពន្លត់អគ្គិភ័យបានធ្វើការយ៉ាងសស្រាក់សស្រាំ ព្រោះតែអគ្គិភ័យកើតឡើងផ្ទួនៗគ្នាខ្លាំងពេក តែយ៉ាងណាក៏ដោយក្រុមអ្នកពន្លត់បានគ្រប់គ្រងស្ថានការណ៍ករណីទាំង ៤ បានយ៉ាងល្អ ហើយពេលនេះខាងអាជ្ញាធរប្រចាំតំបន់នីមួយៗកំពុងតែធ្វើការស្រាវជ្រាវរកមូលហេតុនៃការឆាបឆេះទាំងអស់ផងដែរ៕

ប្រភព៖ Fire and Rescue Thailand