មហាជនបារម្ភ! ខ្នះខ្នែងជួយជាតិ ២ សប្ដាហ៍ ហេង វិសាល មានបញ្ហាចង្កេះធ្ងន់ កំពុងព្យាបាលនៅមន្ទីរពេទ្យ

បើចាប់អារម្មណ៍លើសកម្មភាពសប្បុរសធម៌របស់ប្ដីប្រពន្ធ Youtuber លោក ហេង វិសាល និង អ្នកនាង ជា ស្រីជា ឃើញថារយៈពេលជិត ២ សប្ដាហ៍កន្លងទៅនេះ អ្នកទាំងពីរបានបង្ហាញសកម្មភាពយ៉ាងសកម្មទាំងការប្រើសំឡេងផ្សព្វផ្សាយប្រឆាំងនឹងការឈ្លានពានពីប្រទេសថៃ និង ចំណាយទាំងកម្លាំងស្មារតី ថវិកាផ្ទាល់ខ្លួន ព្រមទាំងធ្វើជាមូលនិធិសម្រាប់ទ្រទ្រង់បងប្អូនភៀសសឹក និង វីរកងទ័ពជួរមុខតាមព្រំដែន។

មកដល់ពេលនេះ ទោះជាស្ថានភាពប្រទេសជាតិបានល្អប្រសើរជាងមុនវិញមែន លោក ហេង វិសាល និង ជា ស្រីនា ក៏នៅបន្តសកម្មភាពនាំយកអំណោយជាមូលនិធិរបស់សប្បុរសជន ដែលរៀបចំជាស្បៀងអាហារ ថវិកា សម្ភារៈផ្សេងៗ ចុះទៅតាមបណ្ដាខេត្តជាប់ព្រំដែន ដើម្បីជូនដល់បងប្អូនកងទ័ពជួរមុខ និង គ្រួសារវីរកងទ័ពពលីបន្តបន្ទាប់ផងដែរ។

ស្របពេលបេសកកម្មមិនទាន់បានបញ្ចប់នៅឡើយ ថ្មីៗនេះ អ្វីដែលធ្វើឱ្យមហាជនកំពុងមានការបារម្ភ ខណៈឃើញលើហ្វេសប៊ុកផេករបស់អ្នកនាង ជា ស្រីនា បានបង្ហោះពីស្វាមី គឺលោក ហេង វិសាល ដែលពេលនេះលោកកំពុងមានបញ្ហាចង្កេះធ្ងន់រហូតសឹងដើរមិនចង់រួច និង កំពុងពិនិត្យព្យាបាលនៅមន្ទីរពេទ្យ។ ក្នុងនោះ ជា ស្រីនា ក៏បានបង្ហាញពីទឹកចិត្តស្វាមីចំពោះប្រទេសជាតិ ទោះជាកំពុងមានបញ្ហាសុខភាព តែលោកនៅតែបារម្ភខ្លាចមូលនិធិរបស់លោក មិនអាចរៀបចំជូនដល់កងទ័ពជួរមុខទាន់ពេលទៀតផង។

សារនោះ អ្នកនាង ជា ស្រីនា បានបង្ហោះរៀបរាប់ថា ៖ «ថ្ងៃនេះ ប្តីខ្ញុំស្រាប់តែឈឺចង្កេះខ្លាំង ហើយដើរមិនចង់រួច ប៉ុន្តែអ្វីដែលគាត់បារម្ភមិនមែនខ្លួនឯងទេ… គឺខ្លាចថាមូលនិធិអាចមិនទៅដល់វីរកងទ័ពទាន់ពេល ឃើញគាត់ធ្វើការ 2 សប្តាហ៍នេះទើបខ្ញុំដឹងថាមានមនុស្សមួយចំនួនដែលធ្វើរឿងធំៗ ក្នុងភាពស្ងាត់ៗដោយគ្មានការទាមទារ សម្រាប់ខ្ញុំ… គាត់គឺជាវីរក្នុងចិត្តខ្ញុំ»៕