នៅថ្ងៃទី ១៦ ខែកក្កដា ឆ្នាំ ២០២៥ នេះ អគ្គនាយកដ្ឋានគយ និង រដ្ឋាករកម្ពុជា បានចេញសេចក្តីជូនដំណឹង អំពីមុខទំនិញមានប្រភពដើមពីប្រទេសថៃ ដែលជាប់បម្រាមនាំចូលមកកម្ពុជា ដែលមានដូចជា ៖
ក. បន្លែ និង ផ្លែឈើ
ខ. ប្រេងឥន្ធនៈ និង ឧស្ម័នឥន្ធនៈ។ មុខទំនិញក្នុងចំណុច ខ នេះ មានដូចខាងក្រោម៖
១. ប្រេងសាំង (Gasoline)
២. ប្រេងម៉ាស៊ូត (Diesel)
៣. ឧស្ម័នរាវសម្រាប់ដុត (LPG និង LNG)
៤. ប្រេងខ្មៅ (Fuel oil)
៥. ប្រេងសាំងយន្តហោះ (Jet-A1)។
អគ្គនាយកដ្ឋានគយ និង រដ្ឋាករកម្ពុជា បានឱ្យដឹងបន្ថែមថា ដោយឡែកចំពោះមុខទំនិញផ្សេងទៀត ក្រៅពីមុខទំនិញក្នុងចំណុច ក និង ខ ខាងលើ មិនមែនជាកម្មវត្ថុនៃការហាមឃាត់ការនាំចូលទេ។ អាជីវករ/ពាណិជ្ជករ នៅបន្តនាំចូលបានជាធម្មតាដោយបំពេញបែបបទ និង នីតិវិធីកំណត់ ដោយលិខិតបទដ្ឋានជាធរមាន។
ក្នុងនោះ ចំពោះតម្រាយផ្លូវ និង មធ្យោបាយដឹកជញ្ជូនទំនិញនាំចូលមកកម្ពុជា អាជីវករ/ពាណិជ្ជករ អាចប្រើប្រាស់មធ្យោបាយដឹកជញ្ជូនផ្សេងៗ និង តាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោកកម្ពុជា-ថៃ ដែលត្រូវបានបិទជាឯកតោភាគីដោយយោធាថៃ។ អគ្គនាយកដ្ឋានគយ និង រដ្ឋាករកម្ពុជា នឹងបន្តតាមដាន និង ធ្វើបច្ចុប្បន្នភាពជូនអាជីវករ/ពាណិជ្ជករ ធុរជន និង សាធារណជនអំពីស្ថានការ និង ការវិវត្តនានាពាក់ព័ន្ធនឹងវិធានការខាងលើនេះ៕
សូមអានសេចក្ដីលម្អិតនៅខាងក្រោម ៖
