មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ចែករំលែកបន្តគ្នាព្រោងព្រាត បន្ទាប់ពីយុវតីមួយរូប បានជួបប្រទះហេតុការណ៍មានអ្នកជិះម៉ូតូតាមពីក្រោយនៅពេលយប់ និង ចែករំលែកជាសារដាស់តឿន ព្រមទាំងទុកជាមេរៀនសម្រាប់ស្ត្រីដែលត្រូវធ្វើដំណើរចាំបាច់នៅពេលយប់ស្ងាត់។
ទាក់ទិនទៅនឹងករណីនេះ តាមរយៈគណនីយុវតីដែលមានឈ្មោះ សុវណ្ណ មុន្នីនាថ បានបង្ហោះសារដាស់តឿន នៅយប់ថ្ងៃទី ១០ ខែកញ្ញា ឆ្នាំ ២០២៥ ទាំងភិតភ័យថា ៖ «សម្រាប់អ្នកធ្វើការហើយចេញពេលយប់ ជាពិសេសស្រីៗត្រូវប្រយ័ត្នទាំងអស់គ្នា។ ជាក់ស្ដែងមុននេះ ខ្ញុំចេញពីធ្វើការហើយឆ្លៀតជិះម៉ូតូលំហែបន្តិច ជិះដំបូងអត់អី លុះជិះដល់ផ្លូវកាច់ ស្រាប់តែមានប្រុសម្នាក់ជិះម៉ូតូសង់ ស្លៀកពាក់ដូចជាអ្នកធ្វើការ មានពាក់មួក មានពាក់ម៉ាសហើយជិះមករកកៀរខ្ញុំ ពេលហ្នឹងខ្ញុំអត់ចាប់អារម្មណ៍ គ្រាន់តែមើលមុខវាហើយជិះទៅមុខទៀត ហើយវាក៏តាមក្រោយខ្ញុំធម្មតាដូចអ្នកជិះតាមផ្លូវទូទៅ ទាល់តែខ្ញុំជិះហួសកន្លែងមានមនុស្សច្រើន ម្នាក់ហ្នឹងស្រាប់តែជិះលឿនមករកកៀកៗម៉ូតូខ្ញុំ ពេលហ្នឹងចាប់ផ្ដើមមានអារម្មណ៍ថាអត់ស្រួលខ្ញុំក៏ចាប់ផ្ដើមមូលហ្គែម៉ូតូជិះឱ្យលឿន ពេលវាឃើញខ្ញុំជិះលឿន វាចាប់ផ្ដើមជិះលឿនដេញតាមខ្ញុំដែរ ពេលខ្ញុំកាច់ទៅណា វាកាច់ទៅហ្នឹងតាមដូចគ្នា វាជិះតាមខ្ញុំរហូត ដែលសំខាន់ស៊យត្រង់ផ្លូវខ្ញុំជិះហ្នឹងវាស្ងាត់ ល្មមតែជិះដល់កន្លែងមានមនុស្សច្រើនវាជិះដេញតាមខ្ញុំឡើងខ្ញុំភ័យញ័រដៃ។
វាដេញតាមខ្ញុំរហូតមកដល់កន្លែងលក់អីវ៉ាន់មួយ ខ្ញុំក៏ជិះចូលកន្លែងបងស្រីហ្នឹងធ្វើដូចចូលទិញអី វាក៏ជិះហួសខ្ញុំទៅ ប៉ុន្តែវានៅជិះតិចៗហើយងាកមើលមកខ្ញុំរហូត ពេលឃើញខ្ញុំនៅយូរ វាក៏ឈប់អត់ទៅណាទេ ខ្ញុំនៅតាមមើលវារហូតដល់បងស្រីអ្នកលក់គាត់សួរ «អូនឯងកើតអីមែន?» ហើយខ្ញុំក៏ប្រាប់គាត់ ហើយទៅបងស្រីគាត់ឱ្យប្អូនប្រុសគាត់មិនដឹង មិត្តភក្តិមិនដឹង ចេញទៅមើលវា ទើបវាជិះម៉ូតូទៅបាត់ទៅ ហើយបងស្រីអ្នកលក់ក៏គាត់ឱ្យខ្ញុំនៅអង្គុយកន្លែងមួយសន្ទុះធំ បានខ្ញុំលាគាត់ហើយជិះមកផ្ទះវិញ»។
យុវតីខាងលើបានរៀបរាប់បន្តទៀតថា ៖ «ចឹងហើយ ខ្ញុំចង់ផ្ដាំផ្ញើទៅអ្នកដែលគាត់ធ្វើការយប់ ជាពិសេសស្រីៗត្រូវប្រុងប្រយ័ត្នបើមានបងប្អូននៅផ្ទះ បើអាចឱ្យគាត់មកយកបណ្ដើរទៅផ្ទះ ឬ មិនចឹងទេមានអ្នកធ្វើការជាមួយត្រូវជិះផ្លូវត្រូវគ្នាអីទៅបានជាគ្នាទៅ ដើម្បីជៀសវាងជួបដូចខ្ញុំ និយាយមែនភ័យញ័រដៃអត់ទាន់បាត់ទេនេះ។ បញ្ជាក់ ខ្ញុំមិនមែនទើបតែជួបទេ ប៉ុន្មានថ្ងៃមុននៅម្ដុំផ្សារតាខ្មៅថ្មី ម៉ោងប្រហែល ១២៖៣០ ថ្ងៃត្រង់ ខ្ញុំក៏ធ្លាប់មានគេជិះតាមចឹងដូចគ្នា ចឹងអ្នកតាខ្មៅក៏ត្រូវប្រយ័ត្នដែរ»៕
