ជាទូទៅ នៅពេលជោគជ័យ មនុស្សជុំវិញខ្លួនតែងតែបង្ហាញមុខអបអរចំពោះអ្នក ចុះតើនៅពេលកើតទុក្ខឬជួបបញ្ហា តើអ្នកអបអរទាំងនោះ មានប៉ុន្មាននាក់ ដែលនឹងបង្ហាញមុខ? បើតាមការចែករំលែករបស់ អ្នកឧកញ៉ា គិត ម៉េង មនុស្សដែលគាំទ្រឬជួយអ្នកពិតប្រាកដ គឺជាមនុស្សដែលនៅក្បែរអ្នកក្នុងគ្រាលំបាកនេះឯង។
អ្នកឧកញ៉ា គិត ម៉េង បានចែករំលែកនៅលើបណ្តាញសង្គមយ៉ាងដូច្នេះថា ៖ «កុំបង្ហាញមុខតែពេលសប្បាយ ឬបានប្រយោជន៍ តែត្រូវបង្ហាញមុខជួយក្នុងគ្រាលំបាកផង!
ជីវិតមិនមែនមានតែភាពសប្បាយរីករាយ ឬជោគជ័យ ដូចជាជោគជ័យក្នុងការទ្បើងឋានៈ ការប្រារព្ធពិធីសប្បាយរីករាយ វិស្សមកាល ឬពេលវេលាសប្បាយជាមួយគ្រួសារគ្រប់ពេលនោះទេ ប៉ុន្តែ ជីវិតក៏ជួបរឿងលំបាក ឬបញ្ហាផងដែរ ដូចជាការស៊ូនឹងការលំបាកដោយភាពស្ងៀមស្ងាត់ ការភ្ញាក់ពីគេងទាំងយប់ជាមួយទុក្ខព្រួយ ការគិតច្រើនហួសហេតុ ដោយគ្មានអ្នកណាម្នាក់នៅជុំវិញអ្នកបានដឹង។
នៅពេលអ្នកប្រឈមនឹងភាពស្ងៀមស្ងាត់តែឯង មនុស្សដែលធ្លាប់អបអរអ្នក បែរជាមិនបង្ហាញមុខ ហើយការអបអរក៏រលាយបាត់បន្តិចម្តងៗ។ នៅគ្រាលំបាកនោះហើយដែលយើងរកឃើញមនុស្សណាដែលនៅក្បែរយើង និង គាំទ្រយើងពិតប្រាកដ។ មិនថាអ្នកដែលនៅតែគាំទ្រយើងជានរណាទេ វត្តមានរបស់ពួកគាត់ពិតជាមានន័យ។ អ្នកទាំងនោះមិនត្រឹមតែបង្ហាញខ្លួននៅជាមួយអ្នកនាពេលរីករាយប៉ុណ្ណោះទេ ប៉ុន្តែក៏បង្ហាញខ្លួននៅក្បែរអ្នកក្នុងគ្រាលំបាកផងដែរ។
យើងរស់នៅក្នុងពិភពលោកមួយ ដែលលើកសរសើរពីផលិតភាព និងភាពជោគជ័យ។ ប៉ុន្តែ ចុះចំណែកអ្នកបង្ហាញខ្លួននៅជាមួយយើងវិញ? តើយើងអាចចំណាយពេលបន្តនៅក្បែរអ្នកបរាជ័យ ឬអ្នកកំពុងជួបការលំបាក ដើម្បីផ្តល់ការគាំទ្រដល់ពួកគេបានទេ?
“សូមធ្វើជាមនុស្សមានទឹកចិត្តដែលពុំចាំបាច់រង់ចាំ ឬត្រូវការឱកាសពិសេសណាមួយក្នុងការបង្ហាញខ្លួន ដើម្បីផ្តល់ការគាំទ្រដល់អ្នកណាម្នាក់”។
មនុស្សដែលអបអរភាពជោគជ័យរបស់អ្នក មិនមែនជាអ្នកគាំទ្រពិតប្រាកដរបស់អ្នកគ្រប់ពេលនោះទេ។ មនុស្សដែលគាំទ្រអ្នក ឬជួយអ្នកពិតប្រាកដ គឺជាមនុស្សដែលនៅក្បែរអ្នកក្នុងគ្រា ដែលអ្នកជួបការលំបាក។ នៅពេលអ្នកដួល មនុស្សដែលបោះដៃទាញអ្នកគឺជាមនុស្សមានភក្តីចំពោះអ្នក។
កុំបង្ហាញមុខតែពេលសប្បាយ ឬបានប្រយោជន៍ តែត្រូវបង្ហាញមុខជួយក្នុងគ្រាលំបាកផង!»៕
