ជាការពិតណាស់ មហាជននិយមតាមដានពីការងាររបស់តារាស្រីកញ្ញា Mina ច្បាស់ជាបានដឹងមកហើយថា កន្លងមក ស្រីស្អាតរូបនេះរមែងចាប់ដៃគូការងារជាមួយនឹងអ្នកផលិតមាតិកាមានប្រជាប្រិយភាព គឺ លោក សៀក។
ក្នុងនោះ កញ្ញា Mina និង លោក សៀក មិនត្រឹមតែត្រូវបានអ្នកគាំទ្រលើកឡើងថា អ្នកទាំង ២ ជាដៃគូការងារដ៏ល្អនោះទេ ពោលគឺសូម្បីតែពាក់ព័ន្ធនឹងស្នេហា ក៏មានអ្នកគាំទ្រចាប់ផ្គូផ្គង់ឱ្យអ្នកទាំង ២ ថែមទៀតផង។ លើសពីនោះ ដោយធ្លាប់ឃើញសកម្មភាពរបស់កញ្ញា Mina និង លោក សៀក មានភាពស្និទ្ធស្នាលខ្លាំង រហូតមានអ្នកយល់ថា ស្រីស្អាតប្រុសសង្ហាពីររូបនេះ ជាគូស្នេហ៍នឹងគ្នា។
យ៉ាងណាមិញ ថ្មីៗនេះ លោក សៀក បានបញ្ចេញសារមួយយ៉ាងភ្ញាក់ផ្អើល ខណៈមានគណនី Tik Tok មួយបានបង្ហោះវីដេអូរបស់លោក និង មិត្តស្រី ដែលគេស្គាល់ថា នារីម្នាក់នោះ មិនមែនជាកញ្ញា Mina នោះឡើយ។ វីដេអូនោះ ត្រូវបានចែករំលែក និង ធ្វើឱ្យមានអ្នកលើកឡើងថា មិត្តស្រីរបស់លោក សៀក គឺជាជនទី ៣ ទៀតផង។
លោក សៀក បានចេញបកស្រាយថា៖ «សួស្តីអ្នកទាំងអស់គ្នា ប៉ុន្មានថ្ងៃមុននេះឃើញប្អូនស្រីម្នាក់ថតខ្ញុំ និង មិត្តស្រីខ្ញុំរួចក៏បង្ហោះលើ TikTok ដោយគ្មានការអនុញ្ញាត ក៏ប៉ុន្តែគាត់ក៏បានលុបរួចរាល់ហើយដែរ។ ខ្ញុំសូមចេញមុខមកបញ្ជាក់ថា ខ្ញុំ និង មិត្តស្រីខ្ញុំបានទាក់ទងគ្នាយូរមកហើយ គ្មានជនទី ៣ អ្វីនោះទេ! ចឹងសូមបងប្អូនទាំងអស់គ្នា កុំមានការយល់ច្រឡំបន្តទៀត។ សូមអរគុណសម្រាប់ការស្រលាញ់ និង រាប់អាន»។
លើសពីនោះ លោក សៀក ក៏បានបញ្ជាក់បន្ថែមនៅក្នុងខមមិនទៀតថា៖ «មិនមាន comment ច្រេីនទេ ដែលថាគាត់ជាជនទី ៣ តែដោយសារតែខ្ញុំចង់ការពារកិត្តិយសគាត់ ទេីបខ្ញុំចេញមុខបកស្រាយឱ្យច្បាស់កុំឱ្យមានការយល់ច្រឡំ»៕
