អ្នកគាំទ្រលោក វណ្ណដា ច្បាស់ជាបានជ្រាបមកហើយ នូវការរៀបចំការប្រគំតន្ត្រីទោលរបស់តារាចម្រៀងរ៉េបរូបនេះ នៅលើទឹកដីខេត្តបាត់ដំបង កាលពីថ្ងៃទី ០៣ ខែឧសភា ឆ្នាំ ២០២៥ កន្លងទៅ។ ក្នុងនោះ ការប្រគំតន្ត្រីទោលរបស់ វណ្ណដា នៅខេត្តបាត់ដំបង គឺមានឈ្មោះថា «ត្រីវិស័យសម័យមាស/Treyvisai Legacy»។
ក្នុងការប្រគំតន្ត្រី «ត្រីវិស័យសម័យមាស/Treyvisai Legacy» នៅក្នុងខេត្តបាត់ដំបង នោះដែរ ក៏មានវត្តមានរបស់តារាចម្រៀងរួមទ្រនំ ៣ រូប មានដូចជា លោក នរិទ្ធ, លោក វណ្ណថាន និង លោក យូហៃ បានចូលរួមសម្តែងដែរ។ លើសពីនោះ អ្វីកាន់តែពិសេសនោះ គឺតារាចម្រៀងរ៉េប វណ្ណដា បានអញ្ជើញរៀមច្បង ២ រូប គឺអ្នកនាង ខាត់ សុឃីម និង ឌីជេ ក្តិប សម្តែងនៅឆាកតន្ត្រីនេះរួមនឹងលោកដែរ។
ជាក់ស្តែង ទិដ្ឋភាពនៃការសម្តែងរបស់រៀមច្បងទាំង ២ រូប ខាងលើ លើឆាកការប្រគំតន្ត្រី «ត្រីវិស័យសម័យមាស/Treyvisai Legacy» បានធ្វើឱ្យអ្នកគាំទ្ររំភើបចិត្តយ៉ាងខ្លាំង សូម្បីតែសាមីខ្លួន ពោលគឺ អ្នកនាង ខាត់ សុឃីម និង ឌីជេ ក្តិប ក៏បង្ហាញអារម្មណ៍រីករាយរបស់ខ្លួន ដែលបានឡើងឆាកសម្តែងរួមគ្នា និង ទទួលបានការគោរពក្នុងនាមជារៀមច្បងពី វណ្ណដា ដែរ។
ក្នុងនោះ អ្នកនាង ខាត់ សុឃីម បានបង្ហោះសារថា ៖ «កម្មពិធី ត្រីវិស័យសម័យមាស របស់បារមី និង ប្អូន វណ្ណដា ប្អូន វណ្ណថាន ពិតជាធ្វើឱ្យបងរំភើបខ្លាំងណាស់ ហួសពីការរំពឹងទុក។ អរគុណ សម្រាប់ការផ្តល់កិត្តិយសដល់សិល្បៈរៀមច្បង»។ រីឯ ឌីជេ ក្តិប វិញនោះ ក៏បានពោលពាក្យអរគុណទៅកាន់សិស្សប្អូនរូបនេះដែរថា៖ «Mann Vannda អរគុណណាស់ Idol ប្អូន! សម្រាប់ក្ដីស្រលាញ់រួមនឹងការឱ្យតម្លៃ ១ នេះ»៕