អ្នកគាំទ្រវិស័យបវរកញ្ញាដែលតាមដានកម្មវិធី Miss Supranational Cambodia 2025 កន្លងមក ក្រៅពីចាប់អារម្មណ៍សរសើរពីរាជិនីម្ចាស់មកុដថ្មី MSC 2025 ឃើញថាចំពោះលំដាប់រងទី ១ MSC 2025 ស្រីស្អាតកូនខ្មែរកាត់អាមេរិក ស៊ីដនី ម៉ារិទ្ធ ក៏មានភាពលេចធ្លោឆក់បានការគាំទ្រមិនធម្មតាដែរ។
ពិតណាស់ ក្រោយក្លាយជាម្ចាស់ជ័យលាភីរងទី ១ MSC 2025 នេះ កញ្ញា ស៊ីដនី ម៉ារិទ្ធ កាន់តែឆក់បានប្រជាប្រិយភាពខ្លាំងពីមហាជនលើបណ្ដាញសង្គម ដែលស្រឡាញ់គាំទ្របវរកញ្ញារូបនេះ ព្រមទាំងនាងកំពុងក្ដោបបានទីផ្សារការងារផ្សេងៗលើវិស័យនេះជាបន្តបន្ទាប់ មិនចាញ់ម្ចាស់មកុដប៉ុន្មានឡើយ។
ដោយឡែក មកដល់ថ្មីៗនេះ អ្វីដែលកាន់តែធ្វើឱ្យមហាជនអ្នកគាំទ្រវិស័យបវរកញ្ញារំភើប និង អបអរខ្លាំង បន្ទាប់ពីទទួលដំណឹងថាកញ្ញា ស៊ីដនី ម៉ារិទ្ធ ត្រូវបានប្រកាសក្លាយជាម្ចាស់មកុដថ្មីនៃកម្មវិធី Miss Planet Cambodia 2025 ដែលនឹងត្រូវតំណាងកម្ពុជាចូលរួមប្រកួតលើឆាកអន្តរជាតិ MPI 2025 ខាងមុខនេះ។
នេះបើតាមរយៈកម្មវិធី Press Conference នៅថ្ងៃទី ១៦ ខែមិថុនា ឆ្នាំ ២០២៥ ដែលកម្មវិធី Miss Planet Cambodia រៀបចំឡើងដើម្បីធ្វើការប្រកាសជាផ្លូវការនូវបវរកញ្ញាម្ចាស់មកុដថ្មី MPC 2025 និង កិច្ចកុងត្រារវាងអ្នកគ្រប់គ្រងថ្មីនៃកម្មវិធី Miss Planet Cambodia ជាមួយអ្នកឧបត្ថម្ភផ្តាច់មុខរបស់កម្មវិធីផងដែរ៕
