នៅយប់ឈានចូលថ្ងៃទី ៨ ខែសីហា ឆ្នាំ ២០២៥ នេះ អាជ្ញាធរនៅប្រទេសថៃ បានចុះទៅចាប់កន្លែងផឹកស៊ីមួយដ៏ល្បី ហើយភ្ញៀវប្រុសស្រីចំនួន ១៧៥ នាក់ រកឃើញមានផ្ទុកសារធាតុញៀននៅក្នុងខ្លួន។
តាមព័ត៌មានបានឱ្យដឹងថា ផាប់ផឹកស៊ីមួយកន្លែងនេះមានឈ្មោះ Soi Rangsit-Nakhon Nayok 21 ស្ថិតនៅឃុំ Prachathipat ស្រុក Thanyburi ខេត្ត Pathum Thani។ ក្រោយពីមានប្រជាជនបានប្តឹងថា ផាប់នេះមានការប្រើប្រាស់គ្រឿងញៀន អាជ្ញាធរក៏បាននាំគ្នាចុះទៅត្រួតពិនិត្យ ដោយបានបិទច្រកចេញទាំងអស់របស់ផាប់ ហើយឃាត់ភ្ញៀវចំនួន ៣៨០ នាក់ មានទាំងយុវជនមិនទាន់គ្រប់អាយុឱ្យត្រួតពិនិត្យសារធាតុញៀន ដោយក្នុងនោះមាន ១៧៥ នាក់បានរកឃើញថាវិជ្ជមានសារធាតុញៀននៅក្នុងខ្លួន។
ដោយឡែក អាជ្ញាធរបានឃើញមានថ្នាំញៀនច្រើនប្រភេទណាស់ដែលភ្ញៀវទាំងនោះបាននាំគ្នាប្រើប្រាស់ ហើយជ្រុះរប៉ាត់រប៉ាយនៅលើដី។ អាជ្ញាធរបានប្រមូលទុកទាំងអស់ដើម្បីធ្វើជាភស្តុតាង ហើយក៏បានបញ្ជូនអ្នកដែលមានសារធាតុញៀនទាំង ១៧៥ នាក់ទៅដំណើរការក្តីទៅតាមផ្លូវច្បាប់ និង បញ្ជូនទៅកាន់មជ្ឃមណ្ឌលបន្សាបគ្រឿងញៀន។ យ៉ាងណាមិញ ម្ចាស់ហាងខាងលើក៏ត្រូវបានអាជ្ញាធរចោទប្រកាន់ពីបទបើកហាងសេវាកម្មដោយគ្មានលិខិតអនុញ្ញាត ការលក់គ្រឿងស្រវឹងផុតម៉ោងកំណត់ ការលក់គ្រឿងស្រវឹងឱ្យមនុស្សអាយុក្រោម ២០ ឆ្នាំ និង ការគាំទ្រឱ្យមានការប្រព្រឹត្តអំពើមិនសមរម្យផងដែរ៕
ប្រភព៖ Khaosod
