មហាជននិយមតាមដានវិស័យបវរកញ្ញា ច្បាស់ជាបានជ្រាបមកហើយនូវរឿងរ៉ាវក្នុងវិស័យប្រកួតបវរកញ្ញាក្នុងប្រទេសកម្ពុជា ដោយមានទាំងរឿងមោទកភាព និង រឿងធ្វើឱ្យអ្នកគាំទ្រខកចិត្តក៏មាន។
ក្នុងនោះដែរ ស្រាប់តែគេឃើញគណនីហ្វេសប៊ុករបស់អ្នកផាត់មុខ លោក វ៉ាត វ៉ាន់ បានបង្ហោះសារយ៉ាងវែងអន្លាយ បង្ហាញពីអារម្មណ៍ពិតរបស់ខ្លួន ក្នុងការសុំចិត្តពាក់ព័ន្ធនឹងអត្តចរិតបេក្ខជន ដែលបានដាក់ពាក្យចូលរួមប្រកួតប្រឡងបវរកញ្ញា។
លោក វ៉ាត វ៉ាន់ បានរៀបរាប់ថា៖ «សូមចិត្ត ត្រង់ៗរឿងមួយ! ប្រឡងបវរកញ្ញា? អ្នកដែលធ្លាប់មានប្រវត្តិមិនល្អ អត្តចរិតមិនល្អ ដែលមិនឱ្យតម្លៃស្រ្តីទាំងខ្លួនជាស្រ្តី ខ្ញុំសូមមិនគាំទ្រឱ្យធ្វើជាបវរកញ្ញាតំណាងឱ្យប្រទេសកម្ពុជាយើងឡើយ ព្រោះស្រ្តីខ្មែរ មិនមែនជាស្រ្តី ដែលតែងតែមានរឿងអាស្រូវ ល្បីដោយគេជេរ ឬចូលចិត្តធ្វើអ្វីដែលគេមិនឱ្យតម្លៃខ្លួនឯងនោះទេ។ បើពិតជានារីម្នាក់នោះ ជាប់តំណាងប្រទេសកម្ពុជា ក៏សូមដកឈ្មោះខ្ញុំជាកូនខ្មែរម្នាក់ផង គឺមិនបានគាំទ្រមនុស្សអសីលធម៌ មកតំណាងឱ្យប្រទេសកម្ពុជាដ៏ល្អផូរផង់មួយនេះឡើយ។ សូមវាយតម្លៃ និង ដាក់ពិន្ទុឱ្យហ្មត់ចត់បំផុត។
ដឹងថាគេល្បី ហើយមនុស្សគ្មាននរណាឥតខ្ចោះ តែធ្វើជាមនុស្សមហាជនក៏ត្រូវទទួលស្គាល់ថា អ្វីត្រូវ ឬខុស សម ឬមិនគប្បី ព្រោះដូនតាខ្មែរនឹងមិនសប្បាយចិត្តនឹងការដែលគេទៅតំណាងប្រទេស យកភាពអាម៉ាស់របស់ខ្លួន រឿងបញ្ហាមិនចេះចប់ បំពុលសង្គម ទៅឱ្យខូចឈ្មោះប្រទេសឡើយ ព្រោះកម្មវិធីបវរកញ្ញា ជាកម្មវិធី ដែលត្រូវការអ្នកដែលមានឈ្មោះល្អ មិនដែលមានបញ្ហាក្នុងសង្គម មានគេស្រឡាញ់ចូលចិត្តច្រើន មិនមែនស្អប់ច្រើនជាស្រឡាញ់ មានកេរ្តិ៍ឈ្មោះល្បីបែបមានតម្លៃ ក្រមសីលធម៌ល្អ ជាបុគ្គល ដែលសុភាពមានអត្តចរិតល្អ មានគំរូល្អដែលក្មេងៗ ស្រ្តីគ្រប់រូបយកតម្រាប់បាន មានភាពសកម្មជាជនជាតិខ្មែរជួយខ្មែរ និង ជាមនុស្សដែលល្អទាំងព្រម មិនមែនគ្រាន់ការស្រឡាញ់ ជាក្ដីស្រមៃខ្លួនតែមួយមុខទេ តែក៏ជាទំនួលខុសត្រូវសម្រាប់ប្រទេសទាំងមូល។
ពិតជាផ្ដល់ក្ដីគោរពធអ្យាស្រ័យ មិនវាយតម្លៃ ឬមើលងាយនរណាទេ តែមើលតាមភាពជាក់ស្ដែង និង ពិតជាចង់ឱ្យកម្ពុជាឱ្យតម្លៃអ្នក ដែលមានសមត្ថភាព និង មានភាពជាបុគ្គលគម្រូពិតប្រាកដ»៕
