មានមន្តស្នេហ៍ខ្លាំង! ម៉ូដខោអាវថ្មីនេះ បុរសៗនឹងហ៊ានលេងខ្លួនពណ៌ស្រាលស្រទន់របស់មនុស្សស្រីឡើងវិញ

សព្វមួយដងពណ៌ Pastel ឬពណ៌ស្រាលស្រទន់ជារសជាតិបែបនារីភាព ច្រើនតែជាការនិយមរបស់មនុស្សស្រី តែឥលូវនេះបុរសនឹងក្លាហានលេងខ្លួនស្លៀកពាក់ពណ៌នេះឡើងវិញ ដោយហេតុអ្នកច្នៃម៉ូដប្រចាំម៉ាក Drewe Taylor បានបញ្ចេញខូឡិកហ្សិនថ្មី នាំយកទំនោរពណ៌ស្រាលៗ លាយឡំម៉ូដដ៏ទាក់ទាញ សម្រាប់បុរសស្លៀកពាក់នារដូវរងា។

ជាក់ស្តែង តាមរយៈកម្មវិធីបង្ហាញម៉ូដ Phnom Penh Designers Week ម៉ាក Drewe Taylor បានបញ្ចេញខូឡិកហ្សិនបុរសសម្រាប់រដូវកាល F/W 2024-25 ជាច្រើនឈុត។ ឃើញថាម៉ាកនេះបានផ្តោតប្រើពណ៌ Pastel ដូចជា ពណ៌ផ្កាឈូក ពណ៌ផ្ទៃមេឃ និង ពណ៌កាប់ស្តាំង។ ពីមួយឈុតទៅមួយឈុត ម៉ូដមានលក្ខណៈហ្វេហ្សិន និង ស៊ីវិល័យ ដោយ អាវលេងម៉ូដវាលបញ្ចេញសាច់ មានជាប្រភេទ Crop top  ខ្លះប្រើក្រណាត់សំណាញ់ ខ្លះសាច់ភ្លឺរលោង ខ្លះទៀតមានលម្អផ្កា និង មានជាអាវក្រៅមើលមកមាំមួន តែបង្កប់ភាពទន់ភ្លន់គួរឱ្យលង់ស្នេហ៍។ ចំពោះខោវិញ ច្រើនចេញជាម៉ូដខោខ្លី និង ខោ Cargo។​

សម្រាប់ខូឡិកហ្សិនថ្មីរបស់ម៉ាក Drewe Taylor មានឈ្មោះថា Moonstruck។ ខូឡិកហ្សិនពណ៌ស្រាលស្រទន់នេះ អ្នកច្នៃម៉ូដ ​លោក​ Ryan​ ​Drewe​ ​Taylor ទទួលបានគំនិតពីគំនូរបុរាណជំនាន់ renaissance ដែលលោកបានឃើញរូបកាមទេពពីរជាមួយពណ៌ស្រាល។ លោកថាជាធម្មតាបុរសភ័យខ្លាចចំពោះការប្រើពណ៌ស្រាលស្រទន់ ដូច្នេះលោកចង់ផ្លាស់ប្តូរគំនិតនេះ៕