ពិតណាស់ ប៉ុន្មានថ្ងៃមកនេះ ចំពោះ MV បទចម្រៀង «សែកមន្ត» របស់កំពូលតារាចម្រៀង ឧកញ៉ា ព្រាប សុវត្ថិ បានបញ្ចេញជាផ្លូវការ ត្រូវបានមហាជនអ្នកលេងបណ្ដាញសង្គម ក៏ដូចជាអ្នកគាំទ្រជាច្រើនបានផ្ទុះការចាប់អារម្មណ៍ចែករំលែកខ្លាំងភ្ជាប់ជាមួយនឹងការបញ្ចេញមតិវែកញែករៀងៗខ្លួនទៅលើបទចម្រៀងនេះ។
លើសពីនេះ ស្របពេលបទចម្រៀង «សែកមន្ត» ផ្ទុះលើបណ្ដាញសង្គម មានទាំងមតិសរសើរពេញចិត្ត និង វែកញែកនេះដែរ ឃើញថារាល់វីដេអូនៃសកម្មភាពលើឆាកប្រគំតន្រ្តី និង វីដេអូផ្សេងៗដែលឧកញ៉ា ព្រាប សុវត្ថិ បានបង្ហោះលើបណ្ដាញសង្គម ក៏កំពុងត្រូវបានមហាជនអ្នកគាំទ្រចូលបញ្ចេញមតិនិយាយទៅកាន់រូបលោកបន្តបន្ទាប់ ដោយបានឃើញមតិរបស់អ្នកគាំទ្រមួយចំនួនវែកញែកក្នុងន័យឱ្យលោកចេញបទចម្រៀងដូចស្ទីលរបស់លោកពីមុនៗវិញ រហូតឃើញអ្នកគាំទ្រប្រើពាក្យថា «សងអាយដលខ្ញុំមកវិញ» ទៀតផង។
យ៉ាងណាមិញ ស្របពេលនេះដែរ ក្រឡេកមើលហ្វេសប៊ុកផេករបស់កំពូលតារាចម្រៀងប្រុសរូបនេះវិញ ថ្មីៗនេះ ក៏បានឃើញឧកញ៉ា បង្ហោះសារមួយ នឹករឭកដល់អនុស្សាវរីយ៍លើវិថីសិល្បៈរបស់លោកឧកញ៉ា ដែលនិយាយពីការប្រឡូកវិស័យចម្រៀងដំបូងមកដល់ពេលនេះរយៈពេលជាង ២៥ ឆ្នាំមកហើយ ហើយរាល់ស្នាដៃរបស់លោក គឺសុទ្ធសឹងតែធ្វើដោយក្ដីស្រឡាញ់ចេញពីចិត្ត។
សារនោះឧកញ៉ា ព្រាប សុវត្ថិ បានរៀបរាប់ថា ៖ «នឹកអនុស្សាវរីយ៍នៃការចូលវិថីសិល្បៈតាំងពីដំបូងរហូតដល់ពេលនេះជាង ២៥ ឆ្នាំ គិតតាមពេលវេលាយូរឆ្នាំ តែនឹកឡើងវិញហាក់ដូចមួយរយៈពេលខ្លីប៉ុណ្ណោះ ព្រោះគ្រប់ពេលវេលា ធ្វើដោយក្ដីស្រឡាញ់!»៕
