កាលពីរាត្រីថ្ងៃទី ២៧ ខែវិច្ឆិកា ឆ្នាំ ២០២៤ កន្លងទៅនេះ កម្មវិធី Miss Planet Cambodia 2024 លើកទី ៤ បានរកឃើញម្ចាស់មកុដហើយ ដោយបានទៅលើបវរកញ្ញាប្រទេសអារ៉ាប់រួម ខណៈលំដាប់រងទី ១ បានទៅ បវរកញ្ញា Luxemburg, លំដាប់រងទី ២ បានទៅលើថៃ, លំដាប់រងទី ៣ បានទៅលើអ៊ុយក្រែន, លំដាប់រងទី ៤ បានទៅលើ ហ្វីលីពីន លំដាប់រងទី ៥ បានទៅលើ USA, និង លំដាប់រងទី ៦ បានទៅលើ Sweden។ លើសពីនោះ បវរកញ្ញាឥណ្ឌូនេស៊ី ក៏ឆក់បានតំណែងគ្រងមកុដ Miss Planet Angel International 2024 ផងដែរ។
ដោយឡែក ក្រឡេកទៅមើលមុនការប្រកួតវគ្គផ្តាច់ព្រ័ត្រ Miss Planet International 2024 អ្នកស្នេហាវិស័យបវរកញ្ញា ច្បាស់ជាបានជ្រាបហើយ ពីការប្រកាសធ្វើពហិកាមិនបន្តចូលរួមប្រកួតរបស់កញ្ញា ដេត ស្រីនាឌ ដែលតម្រូវឱ្យលំដាប់រងទី ១ កញ្ញា ខន សុវណ្ណសូនីតា ក្លាយជាម្ចាស់មកុដថ្មី MPC 2024 ភ្លាមៗបន្តក្នុងការប្រកួត។
ក្នុងនោះ មហាជនអ្នកទស្សនាកម្មវិធីប្រកួត Miss Planet International 2024 ជាពិសេស អ្នកគាំទ្របវរកញ្ញាកម្ពុជា បានបង្ហាញអារម្មណ៍សរសើរដល់ កញ្ញា ខន សុវណ្ណសូនីតា ម្ចាស់មកុដថ្មី MPC 2024 ដែលបានឡើងទៅប្រកួត ដោយមិនបានត្រៀមខ្លួនទុកជាមុន ពោលគឺនៅសល់មិនប៉ុន្មានម៉ោងទៀតប៉ុណ្ណោះ។
ម្យ៉ាងវិញទៀត បើទោះជាមិនបានទទួលជ័យជម្នះ តែ ខន សុវណ្ណសូនីតា ឆក់បានបេះដូងមហាជនដោយការប្រឹងប្រែងរបស់នាង ដោយសូម្បីតែការត្រៀមខ្លួន ការហាត់សមដើរលើឆាកប្រកួតនឹងបវរកញ្ញាបណ្តាប្រទេសផ្សេងទៀតក៏មិនបានធ្វើ តែនាងធ្វើបានល្អលើឆាកប្រកួត Miss Planet International 2024។
គួរជម្រាបថា Miss Planet Cambodia 2024 កញ្ញា ខន សុវណ្ណសូនីតា មិនបានឈានទៅដល់ Top កំពូលនោះឡើយ តែនាងឆក់បានតំណែង Miss Queen Popular Vote និង Top 27+1៕
