និយាយពី Miss Queen Cambodia 2021 កញ្ញា សៃ ហ្វុន ដ្បិតតែមិនទទួលបានជោគជ័យក្នុងការប្រកួតដណ្ដើមមកុដ Miss Universe Cambodia 2023 បានត្រឹមដំណែងលំដាប់រង ១ មែន តែមកដល់ពេលនេះ នៅតែជាបវរកញ្ញាដ៏លេចធ្លា និង ជាគ្រាប់ពេជ្រក្នុងចិត្តអ្នកគាំទ្រវិស័យបវរកញ្ញា ដែលស្រឡាញ់ពេញចិត្តនាងខ្លាំងដដែល។
លើសពីនេះ បវរកញ្ញាភេទទី ៣ សៃ ហ្វុន តែងទទួលបានការជំរុញលើកទឹកចិត្តពីមហាជនអ្នកគាំទ្រវិស័យបវរកញ្ញាខ្លាំងឱ្យនាងវិលត្រឡប់ចូលប្រកួតដណ្ដើមយកមកុដម្ដងទៀតក្នុងកម្មវិធីណាមួយ ដោយសារតែមើលឃើញពីសមត្ថភាព និង ភាពលេចធ្លោរបស់នាង។
ដោយឡែក ថ្មីៗនេះ សៃ ហ្វុន ក៏បានធ្វើឱ្យមហាជនអ្នកគាំទ្រវិស័យបវរកញ្ញាហាក់មានការភ្ញាក់ផ្អើល និង រំភើបចិត្តជាថ្មី ខណៈបានឃើញនាងបង្ហោះរូបភាពប៉ុន្មានសន្លឹកក្នុងនាមជាបវរកញ្ញាលំដាប់រងទី ១ នៃ Miss Universe Cambodia 2023 ដោយភ្ជាប់ជាមួយដំរួយមួយហាក់ចង់ចូលរួមប្រកួតកម្មវិធី MUC ម្ដងទៀតក្នុងឆ្នាំ ២០២៥ ខាងមុខនេះ។ ក្នុងនោះ សៃ ហ្វុន បានបង្ហោះរូបភាពនោះភ្ជាប់ជាមួយនឹងសារថា ៖ «I Hope I believe and I make it» ព្រមទាំងរូបភាពចក្រវាលតំណាងឱ្យកម្មវិធី Universe ទៀតផង។
ក្រោយពីឃើញបែបនេះ មហាជនអ្នកគាំទ្រវិស័យបវរកញ្ញាជាច្រើនកំពុងបង្ហាញការគាំទ្រ និង ជំរុញលើកទឹកចិត្តនាងយ៉ាងពេញទំហឹង បើសិនជានាងមានបំណងចង់វិលត្រឡប់ចូលប្រកួតដណ្ដើមមកុដក្នុងកម្មវិធីនេះជាថ្មី៕
