មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ស្ងើចសរសើរមិនដាច់ពីមាត់ចំពោះភាពច្នៃប្រឌិតរបស់អ្នកគ្រូៗ នៃសាលាមត្តេយ្យសិក្សាមួយនៅក្នុងខេត្តព្រៃវែង ដែលបានចំណាយពេលវេលា និង កម្លាំងកាយចិត្ត ពួតដៃគ្នាកែច្នៃបរិស្ថានសាលា មានគូរផ្លូវដើរចម្រុះពណ៌ និង រចនាសម្ព័ន្ធផ្សេងៗ ស្រស់ស្អាតទាក់ទាញគួរឱ្យចង់ទៅសិក្សា។
សាលាមត្តេយ្យសិក្សា ដែលកំពុងទទួលបានការចាប់អារម្មណ៍ ក្រោមថ្មីដៃច្នៃប្រឌិតរបស់អ្នកគ្រូៗនេះផងដែរ ត្រូវបានគេស្គាល់ថាជាសាលាមត្តេយ្យសិក្សាធនធាន បណ្ឌិតភីតថឺលីណា ស្នាយពល ដែលមានទីតាំង ស្ថិតនៅក្នុងភូមិស្នាយពល ឃុំរកា ស្រុកពារាំង ខេត្តព្រៃវែង។
ជាក់ស្ដែង កាលពីថ្ងៃទី ១៧ ខែវិច្ឆិកា ឆ្នាំ ២០២៤ ថ្មីៗនេះ តាមរយៈផេក មត្តេយ្យធនធានបណ្ឌិត ភីតថឺលីណា ស្នាយពល បានបង្ហាញពីសកម្មភាពអ្នកគ្រូៗ ពួតដៃគ្នាចូលរួមការងារបរិស្ថានក្នុងសាលា បង្កើតបានជាទស្សនីយភាពចម្រុះពណ៌ ទាក់ទាញចិត្តកុមារមត្តេយ្យសិក្សាឱ្យកាន់តែចង់ចូលរៀន ព្រមទាំងទទួលបានការស្ញប់ស្ញែងមិនដាច់ពីមាត់ពីសំណាក់មហាជន ត្បិតថាបរិវេណសាលាពោរពេញទៅដោយរបៀបរៀបរយ មានការរៀបចំប្រកបដោយភាពច្នៃប្រឌិត អនាម័យ មានសួនផ្កាចម្រុះ និង ដើមឈើធំតូច ផ្សារភ្ជាប់ជាមួយធម្មជាតិជាទីមនោរម្យ៕
