នៅរាត្រីថ្ងៃទី ២០ ខែវិច្ឆិកា ឆ្នាំ ២០២៤ កន្លងទៅថ្មីៗនេះ កម្មវិធីប្រកួតសម្រស់ Miss Global Cambodia 2024 បានប្រកាសរកឃើញរាជិនីគ្រងមកុដហើយ គឺបានទៅលើកញ្ញា ខុន ស្រីខួច ជាបេក្ខនារីតំណាងឱ្យខេត្តបាត់ដំបង។
បើនិយាយពី Miss Global Cambodia 2024 កញ្ញា ខុន ស្រីខួច មានទាំងសមត្ថភាព រូបសម្រស់ និង ចំណេះដឹង លេចធ្លោខ្លាំង ដែលចំណុចទាំងអស់នេះហើយ ទើបធ្វើឱ្យ ស្រីខួច អាចយកឈ្នះចិត្តគណៈកម្មការ ក៏ដូចជាទស្សនិកជន រហូតក្លាយជាម្ចាស់មកុដ Miss Global Cambodia ថ្មីប្រចាំឆ្នាំ ២០២៤ ហើយកញ្ញាក៏ត្រៀមខ្លួនតំណាងឱ្យប្រទេសកម្ពុជាទៅប្រកួតលើឆាកអន្តរជាតិផងដែរ។
ដោយឡែក ក្រឡេកទៅកាន់ការឆ្លើយសំណួរ ខណៈកំពុងស្ថិតក្នុង Top 6 នោះដែរ កញ្ញា ខុន ស្រីខួច ទទួលបានសំណួរពីគណៈកម្មការថា ៖ «បើប្អូនក្លាយទៅជាស្ត្រីម្នាក់ ដែលមានឥទ្ធិពលនៅក្នុងសង្គម តើប្អូននឹងធ្វើអ្វីមុនគេ?»។ ចង់ដឹងថាចម្លើយរបស់កញ្ញា ខុន ស្រីខួច ឆ្លើយបានល្អខ្លាំងកម្រិតណា រហូតធ្វើឱ្យនាងឈ្នះបានមកុដនោះ សូមមកអានចម្លើយដុលទាំងស្រុងដែលយើងបានដកស្រង់ចេញពីវីដេអូ ខណៈពេលកញ្ញាកំពុងប្រកួតដូចខាងក្រោម។
កញ្ញា ខុន ស្រីខួច បានឆ្លើយថា ៖ «ប្រសិនបើនាងខ្ញុំ គឺជាស្ត្រីម្នាក់មានឥទ្ធិពលនៅក្នុងសង្គម នាងខ្ញុំនឹងធ្វើការបង្កើតអង្គការមួយដែលមានការថែរក្សា និង ព្យាបាលអ្នកជំងឹបាក់ទឹកចិត្ត ព្រោះសព្វថ្ងៃនេះ នាងខ្ញុំសង្កេតឃើញថាជំងឺបាក់ទឹកចិត្តនៅក្នុងប្រទេសកម្ពុជា គឺកាន់តែកើនឡើងជាយថាប្រភេទ ដូច្នេះហើយការដែលក្លាយទៅជាស្ត្រីមួយរូបដែលមានឥទ្ធិពលនៅក្នុងសង្គមនោះ ប៉ុន្តែគួបផ្សំជាមួយការយកចិត្តទុកដាក់ពីថ្នាក់ដឹកនាំ និង បងៗជំនួយធំមួយចំនួន ដើម្បីលុបបំបាត់នូវការគិតអវិជ្ជមាន នូវការគិតបញ្ចប់ជីវិតខ្លួនឯង គឺវានឹងល្អប្រសើរឡើង ហើយប្រទេសកម្ពុជាពោរពេញដោយធនធានមនុស្ស។ ពាក្យថាខ្ញុំមិនអីទេ ខ្ញុំចង់នៅភាពស្ងប់ស្ងាត់ម្នាក់ឯង ខ្ញុំអាចទៅរួច វាគ្រាន់តែជាការយកលេសរបស់ពួកគេតែប៉ុណ្ណោះ ដើម្បីពន្យារនៃការបាត់បង់ជីវិតរបស់ពួកគេ ស្ពានជ្រោយចង្វារ គឺជាស្ពានដែលចម្លងយុវជន និង យុវតីកម្ពុជារាប់លាននាក់ វាមិនមែនជាស្ពាននៃការបញ្ចប់ជីវិតចុងក្រោយរបស់ពួកគេនោះទេ។ ប្រសិនបើនាងខ្ញុំ គឺជាអ្នកដែលមានឥទ្ធិពល គឺជាស្ត្រីដែលអាចកែប្រែរឿងអវិជ្ជមានមួយនេះបាន នាងខ្ញុំនឹងនាំមកនូវសន្តិភាព និង ក្លាយទៅជាអ្នកដឹកនាំមួយទៅដោយភាពស្មោះត្រង់ សូមអរគុណ»៕
សូមទស្សនា វីដេអូខាងក្រោម៖
