មកដល់ត្រីមាសទី ៣ ជាដំណាក់កាលមួយដែលពិបាកគេងបំផុតចំពោះស្ត្រីពពោះ។ ជាទូទៅ ស្ត្រីនឹងមានអាការចុករោយចង្កេះ ឈឺទ្រូង ស្ទះដង្ហើមពេលគេង និង សញ្ញាមួយចំនួនទៀតធ្វើឱ្យអារម្មណ៍មិនស្រណុក។ កាលណាមានអាការទាំងនេះ វានឹងរំខានដល់ការគេង ធ្វើឱ្យស្ត្រីគេងមិនគ្រប់ កើតអស់កម្លាំងនៅពេលថ្ងៃ និង ជាលទ្ធផលនៃការផ្លាស់ប្តូររាងកាយផ្សេងៗ។
តាមការស្រាវជ្រាវ ការគេងមិនគ្រប់គ្រាន់នៅអំឡុងត្រីមាសទី ៣ អាចប្រឈមបញ្ហាជាច្រើន ក្នុងនោះបញ្ហាដែលកើតញឹកញាប់ជាងគេ គឺជំងឺបម្រុងក្រឡាភ្លើង និង ការកើតមិនគ្រប់ខែ។ ចំពោះស្ត្រីឧស្សាហ៍គេងពុំលក់ឬមានទម្លាប់ស្រមុក អាចប្រឈមទំហំទារកធំពេកឬតូចពេកមិនត្រូវស្តង់ដាអាយុនៅពេលសម្រាល។ មួយវិញទៀត អាចប្រឈមការឈឺពោះក្រសម្រាលឬរហូតឈានដល់ការវះកាត់។ ការគេងមិនគ្រប់ ក៏ជាប់ពាក់ព័ន្ធប្រឈមខ្ពស់កើតជំងឺទឹកនោមផ្អែមនៅអំឡុងពពោះ ធ្វើឱ្យម្តាយ និង កូនក្នុងផ្ទៃជួបស្ថានភាពពិបាកផងដែរ។ ដោយឡែក បើគេបានគេងគ្រប់គ្រាន់វិញ ស្ត្រីនឹងមានឱកាសផ្តល់ទឹកដោះគ្រប់គ្រាន់ដល់កូននៅពេលសម្រាល និង ជៀសឆ្ងាយពីជំងឺធ្លាក់ទឹកចិត្ត។
ចុះគួរធ្វើបែបណាដើម្បីសម្រួលការគេងឱ្យប្រសើរឡើងវិញ? បើតាមអ្នកស្រាវជ្រាវ ជំហានដំបូងត្រូវផ្តោតសម្រួលទៅលើបញ្ហាជាក់លាក់ដែលកើតមកលើរាងកាយ។ ជាក់ស្តែង ដើម្បីការពាររមួលក្រពើ និង រសាប់រសល់ជើង អ្នកត្រូវធ្វើសកម្មភាពស្រាលៗឬប្រើអាហារបំប៉នមានជាតិរ៉ែមុនពេលចូលគេង។ ជៀសវាងបញ្ហាឈឺទ្រូងដោយគេងផ្អៀងទៅខាងឆ្វេង បរិភោគឱ្យតិចមុនគេ មិនត្រូវបរិភោគកៀកម៉ោងចូលគេង និង ជៀសវាងញុំាអាហារខ្លាញ់ឬអាហារហឹរ។
ការផ្តល់ផាសុកភាពចំពោះដំណេកក៏រួមចំណែកដល់ការគេងឆាប់លក់ផងដែរ។ ព្យាយាមកំណត់ម៉ោងចូលគេងឱ្យទៀងទាត់ ហើយបង្កើតកន្លែងគេងឱ្យមានផាសុកភាព ងងឹត និង ស្ងប់ស្ងាត់។ មុនពេលចូលគេងអាចងូតទឹកក្តៅឧណ្ហៗ ញុំាភេសជ្ជៈឧណ្ហៗសម្រួលអារម្មណ៍ ជៀសវាងកាហ្វេ ជៀងវាងមើលឧបករណ៍អេឡិចត្រូនិច ហោចណាស់ពីរម៉ោងមុនដំណេក។
សម្រាប់ស្ត្រីមានជំងឺថប់បារម្ភ អ្នកអាចចុះឈ្មោះចូលថ្នាក់ហាត់យូហ្គាឬថ្នាក់ធ្វើលំហាត់ប្រាណជាលក្ខណៈគ្រួសារ ដើម្បីទទួលបានបរិស្ថានគាំទ្រផ្លូវចិត្ត។ ការហាត់ប្រាណជាប្រចាំពិតជាផ្នែកមួយដ៏សំខាន់ជួយដល់ការគេង តែយ៉ាងណាមិញ ការធ្វើហាត់ប្រាណគួរជៀសវាងធ្វើនៅកៀកម៉ោងចូលគេង បើចង់ហាត់អាចជាបែបយូហ្គាស្រាលៗឬលំហាត់ប្រាណសម្រាកផ្លូវចិត្ត។ អាចទទួលការម៉ាស្សាឬស្តាប់តន្ត្រី ដែលជាផ្នែកមួយជួយឱ្យអារម្មណ៍សម្រាក និង ស្ងប់ល្អផងដែរ៕
ប្រភព៖ Sleepfoundation
