នៅយប់ថ្ងៃទី ១៨ ខែវិច្ឆិកា ឆ្នាំ ២០២៤ កន្លងទៅ មហាជនអ្នកប្រើប្រាស់បណ្ដាញសង្គមហ្វេសប៊ុកបានចែករំលែកបន្តគ្នាព្រោងព្រាត ចំពោះដំណឹងស្វែងរកអតីតកីឡាករបាល់ទាត់ជម្រើសជាតិកម្ពុជា ណុប តុលា ដែលលោកបានចាកចេញពីផ្ទះ ព្រមទាំងបង្ហោះសារលាក្រុមគ្រួសារសោកស្ដាយ។
បន្ទាប់ពីបានបាត់ខ្លួនអស់រយៈពេល ២ យប់ ៣ ថ្ងៃ នៅព្រឹកថ្ងៃទី ២០ ខែវិច្ឆិកា ឆ្នាំ ២០២៤ នេះ តាមរយៈផេក Cambodian Premiere League ខេមបូឌានព្រីមៀរលីគ បានបង្ហោះសារចូលរួមរំលែកមរណទុក្ខយ៉ាងក្រៀមក្រំបំផុត ចំពោះក្រុមគ្រួសាររបស់កីឡាករ នុប តុលា និង ក្លឹបបាល់ទាត់សមាគមកីឡាបាល់ទាត់ក្រសួងមហាផ្ទៃ ព្រមទាំងបានចូលរួមសម្តែងនូវសមានទុក្ខសោកស្តាយចំពោះការបាត់បង់ដ៏ធំមួយនេះ។
ក្នុងនោះផងដែរ បើតាមការឱ្យដឹងពីគណនីហ្វេសប៊ុកមួយដែលមានឈ្មោះ Rin Ratanak បានបង្ហោះរូបភាពភ្ជាប់ជាមួយសារ នៅព្រឹកថ្ងៃទី ២០ ខែវិច្ឆិកា ឆ្នាំ ២០២៤ នេះ ឱ្យដឹងថា ៖ «រកឃើញសព អតីតកីឡាករជម្រើសជាតិ នុប តុលា អណ្តែតទឹកនៅកោះអន្លង់ចិន ព្រឹកថ្ងៃទី ២០ វិច្ឆិកា ២០២៤»។
សូមរំឭកផងដែរថា កាលពីយប់ថ្ងៃទី ១៨ ខែវិច្ឆិកា ឆ្នាំ ២០២៤ កន្លងទៅ បន្ទាប់ពីបង្ហោះសារលាក្រុមគ្រួសារ លោក នុប តុលា បានបន្សល់ទុកម៉ូតូ និង សម្ភារនៅម្តុំស្ពានព្រែកសំរោង ដែលនាំឱ្យក្រុមគ្រួសារ ព្រមទាំងភរិយារបស់លោកបាននាំគ្នាចុះស្វែងរក និង បានអុជធូបបន់ស្រន់ម្ចាស់ទឹកម្ចាស់ដីនៅស្ពានព្រែកសំរោង ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្តាល៕
