បើគិតមកដល់ពេលនេះ រយៈពេលប្រមាណជាង ១០ ឆ្នាំ មកហើយ ដែលតារាចម្រៀងសំនៀងរដឺន អ្នកនាង សូ សុភ័ក្ត្រ បានចាកចេញពីប្រទេសកម្ពុជាទៅរស់នៅឯក្រៅប្រទេសកាលពីអំឡុងឆ្នាំ ២០០២។ ក្នុងនោះដែរ បច្ចុប្បន្ន អ្នកនាង ក៏បានរៀបការសាងគ្រួសារ និង ទទួលបានចំណងដៃកូនប្រុសចំនួន ២ នាក់ហើយដែរ។
ត្រឡប់ក្រោយ ទៅកាន់អតីតកាល កាលពី អ្នកនាង សូ សុភ័ក្រ្ត ឈរជើងលើវិស័យសិល្បៈនៅក្នុងប្រទេសកម្ពុជាឯណោះវិញ អ្នកនាង ត្រូវបានមហាជនសរសើរពីទឹកដមសំឡេងរបស់នាង ដែលអាចច្រៀងបានគ្រប់ទម្រង់ មិនថាតែជាសំនៀងរដឺន ឬក៏មិនរដឺនក្តី។ លើសពីនោះ អ្នកនាង សូ សុភ័ក្ត្រ ក៏អាចសម្តែងបានយ៉ាងល្អទៀតផង។
ដោយឡែក ថ្មីៗនេះ អ្នកនាង សូ សុភ័ក្ត្រ ទើបតែទម្លាយពីអតីតកាលរបស់នាង ជាមួយនឹង នាយ ក្រឹម ពាក់ព័ន្ធនឹងការសម្តែងរឿងកំប្លែង ដោយអ្នកនាងលើកឡើងថា នាយក្រឹម គឺជាបុគ្គលដំបូងបង្រៀនអ្នកនាង ឱ្យចេះសម្តែងកំប្លែង។
អ្នកនាង សូ សុភ័ក្ត្រ បានរៀបរាប់ថា៖ «លោកនាយក្រឹម ជាបុរសទីមួយ ដែលដឹកនាំឱ្យខ្ញុំចេះលែងកំប្លែង ហើយក៏សោកស្ដាយ ដែលខ្ញុំបានទទួលការងារមួយ ដែលអ្នកដឹកនាំតម្រូវឱ្យខ្ញុំលាលេងពីការសម្ដែងកំប្លែងទាំងបង្ខំចិត្ដ។ កន្លងមកជាច្រើនឆ្នាំ ខ្ញុំក៏មិនដែលបានថ្លែងអំណរអរគុណដល់បង ដែលបានផ្ដល់ឱកាសឱ្យខ្ញុំសម្តែងរួមគ្នា អរគុណបងសម្លាញ់»៕
