មកទល់ពេលនេះ ស្រ្តីដ៏មានសក្កានុពល ប្រាសាទ ដាវីន នៅតែធ្វើឱ្យមហាជនអ្នកគាំទ្រវិស័យបវរកញ្ញាទូទាំងប្រទេសចែករំលែកអបអរពេញបណ្ដាញសង្គម ដោយមិនទាន់បាត់រំភើបនៅឡើយជាមួយលទ្ធផលរបស់អ្នកនាងលើអន្តរជាតិ Miss Universe 2024 ម្សិលមិញនេះ។
ដ្បិតតែមិនអាចមានឱកាសចូលដល់ Top ជ្រៅ ដោយបានត្រឹមតែ Top 30 មែន ប៉ុន្តែអ្នកនាងក៏អាចបំបែកកំណត់ត្រាប្រវត្តិសាស្រ្តកម្ពុជាឈានចូល Top លើកដំបូងនៃកម្មវិធី Miss Universe ហើយនេះជាប្រវត្តិសាស្ត្រមួយសម្រាប់កម្ពុជាដែលមានបវរកញ្ញាអាចធ្វើបាន ខណៈកម្ពុជាទើបតែបោះជំហានចូលរួមប្រកួតបានចំនួន ៨ លើកនោះ។
ក្នុងការប្រកួតកម្មវិធីអន្តរជាតិដ៏អស្ចារ្យនេះដែរ ក្រៅពីទទួលបានឱកាសចូល Top 30 នៃ Miss Universe 2024 បើគិតពីលទ្ធផលសរុបដែលបវរកញ្ញាអ្នកនាង ប្រាសាទ ដាវីន ទទួលបានដោយការប្រឹងប្រែងលើឆាកអន្តរជាតិនេះ និង មានការជ្រោមជ្រែងពីអ្នកគាំទ្រវិស័យបវរកញ្ញាកម្ពុជាតាំងពីដំណើរការប្រកួតមក គឺអ្នកនាងបាននាំយកលទ្ធផលល្អៗលើកមុខមាត់ប្រទេសផ្សេងទៀតដូចជា៖
– Top 30 Miss Universe 2024
– Gold Winner Voice for Change Award
– Top 3 Fan Vote Category of the Fan Vote
– Top 20 Best Make Up
យ៉ាងណាមិញ ក្រឡេកទៅមើលអ្នកនាង ប្រាសាទ ដាវីន ក្រោយពីបញ្ចប់ការប្រកួតចុះពីឆាកវគ្គផ្ដាច់ព្រ័ត្រភ្លាម ក៏បានឃើញអ្នកនាងឡាយវីដេអូលើហ្វេសប៊ុកនិយាយជាមួយអ្នកគាំទ្រជុំវិញរឿងរ៉ាវនៃការប្រកួត និង លទ្ធផលដែលអ្នកនាងទទួលបានពីលើឆាកមួយនេះ។
ក្នុងនោះ អ្វីដែលរឹតតែធ្វើឱ្យមហាជនអ្នកគាំទ្រកម្ពុជាចាប់អារម្មណ៍ចែករំលែកខ្លាំង និង រំភើបចិត្តជំនួសអ្នកនាង ខណៈបានស្ដាប់ការរៀបរាប់របស់អ្នកនាងឱ្យដឹងថា បន្ទាប់ពីទទួលបានឱកាសចូល Top ៣០ នេះហើយ គឺកម្ពុជាយើងទទួលបានការចាប់អារម្មណ៍ខ្លាំងពីខាងកម្មវិធី ដែលអ្នកនាងអាចនៅមានឱកាសបន្តសកម្មភាពជាមួយ Miss Universe ថែមទៀត ដោយខាងម្ចាស់កម្មវិធីផ្ទាល់គឺ លោកស្រី Anne ចង់អញ្ជើញអ្នកនាងទៅស្ថាប័ន MU នៅឯប្រទេសថៃ និង ចង់សម្ភាសចង់ស្គាល់ពីកម្ពុជាឱ្យបានច្រើនជាងនឹងទៀតផង៕
