ដ្បិតថាព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក បានបញ្ចប់ទៅហើយក្ដី តែអ្នកស្នេហាវិស័យទូក-ង នៅកម្ពុជា នៅតែលើកយកប្រធានបទទូកឆ្នាំនេះមកជជែកកម្សាន្តជាហូរហែ ខណៈប្រិយមិត្តមួយជាច្រើន នាំគ្នាផ្ទុះការចាប់អារម្មណ៍ទៅលើទូកដែលមកពីខេត្តបាត់ដំបង ដែលទទួលបានប្រជាប្រិយភាពខ្លាំង ក្នុងឱកាសព្រះរាជពិធីបុណ្យអុំទូកគឺទូកឈ្មោះ «នរិន្ទរង្សី ពិជ័យចិត្របុត្រ»។
អ្វីដែលកាន់តែពិសេសទៀតនោះ មហាជនក៏បាននាំគ្នាចាប់អារម្មណ៍ទៅលើកីឡាករចំណុះទូកនីមួយៗនៃទូក «នរិន្ទរង្សី ពិជ័យចិត្របុត្រ» ផងដែរ ដែលមានរូបរាងស្រស់សង្ហា ពិសេសគឺចំណុះទូកស្មាឯក ដែលមានកាយសម្បទាមាំមួនញញឹមស្រស់ មានឈ្មោះ ចាត សេរីវឌ្ឍន៍ ដែលមិនត្រឹមជាចំណុះស្មាឯកដ៏មានសមត្ថភាពប៉ុណ្ណោះនោះទេ តែថែមទាំងមានតួនាទីជានគរបាលមួយរូបផងដែរ ដែលបម្រើការងារនៅខេត្តបាត់ដំបង ខណៈចំណុចទាក់ទាញនៃកាយសម្បទាមាំមួនញញឹមស្រស់នេះហើយ បានធ្វើឱ្យមហាជនចាប់អារម្មណ៍ព្រោងព្រាតពេញបណ្ដាញសង្គម។
គួរបញ្ជាក់ផងដែរថា ក្រោយព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ ២០២៤ បានបញ្ចប់ទៅជាស្ថាពរ ទូក «នរិន្ទរង្សី ពិជ័យចិត្របុត្រ» ទទួលបានចំណាត់ថ្នាក់ផ្នែកសោភ័ណភាព ចំណាត់ថ្នាក់ល្បឿនផែនលេខ ១ និង ចំណាត់ថ្នាក់លេខ ៥ ផ្នែកល្បឿនទូទាំងប្រទេស ដោយបានឈ្នះ ៥ ជើង ក្នុងការប្រកួត ៦ ជើង៕
