កន្លងមក អ្នកលេងបណ្តាញសង្គមហ្វេសប៊ុក និង Tik Tok ច្បាស់ជាបានជ្រាបមកហើយពីបច្ចុប្បន្នភាពរបស់កូនប្រុសច្បង តារាកំប្លែង យិន សារឹម ហៅ នាយ វាំងឌឺ គឺលោក យិន ភីដេត ក្រោយឪពុកម្តាយ និង ប្អូនស្រីបង្កើតបានចែកឋានទៅ នៅសល់តែលោកម្នាក់ឯងប៉ុណ្ណោះ។
ក្រោយមកគេបានដឹងដំណឹងពីកូនប្រុសច្បងតារាកំប្លែង វាំងឌឺ គឺលោក ភីដេត ថាលោករស់នៅតែលតោលម្នាក់ឯង ធ្វើការរោងចក្រ និង រស់នៅក្នុងផ្ទះជួលតម្លៃ ៤៥ ដុល្លារ។ លើសពីនោះ លោក ភីដេត មាននិស្ស័យផ្នែកចម្រៀង ហើយក៏ចេះកំប្លែងដូចឪពុកដែរ ប៉ុន្តែដោយលោកមិនស្គាល់គេ មិនដឹងរកអ្នកណាឱ្យបើកផ្លូវជួយលោកនោះទេ ដូច្នេះមានតែការលើកដៃសុំឱ្យផលិតករ និង អ្នកសិល្បៈរៀមច្បងជួយហៅលោកទៅថតផង។
យ៉ាងណាមិញ ក្រោយពីបានឃើញការអំពាវនាវពីលោក ភីដេត តំណក់ឈាមតែម្នាក់ ដែលបន្សល់នៅរបស់តារាកំប្លែង វាំងឌឺ ឱ្យលោកមានឱកាសបានសម្តែងនោះ គេក៏បានឃើញ នាយ ព្រែក ក៏ដូចជា ពូ ណុយ និង ក្រុមសម្តែងជាច្រើនទៀត ក៏បានហៅលោក ភីដេត ឱ្យទៅសម្តែងក្នុងក្រុមរបស់លោកដែរ ដោយពេលនេះលោកបានដាក់ឈ្មោះក្នុងវិថីសិល្បៈថា វ៉ាងដេត។
ក្នុងវីដេអូចេញសម្តែងរបស់លោក វ៉ាងដេត បានធ្វើឱ្យមហាជនមានការចាប់អារម្មណ៍ និង បានសរសើរដូចគ្នាដែរ ដោយកូនប្រុសច្បង នាយ វាំងឌឺ រូបនេះ គឺពិតជាមិនខុសពីឪពុកនោះឡើយ ពោលគឺដូចពាក្យចាស់ពោលថា ស្លឹកឈើជ្រុះមិនឆ្ងាយពីគល់។ ម្យ៉ាងវិញទៀត មហាជនបានលើកឡើងថា ការតស៊ូរបស់លោកពិតជាមិនខុសទេ ដោយពេលនេះ ក្រោយបានការហៅសម្តែងជារឿយៗលោកក៏អាចរកប្រាក់ចំណូលបានខ្លះដែរ។
គួររំឭកថា លោក ភីដេត កូនប្រុសច្បង លោក វាំងឌឺ បានកំព្រាឪពុកតាំងពីលោកអាយុ ១០ ឆ្នាំ ដោយលោកឪពុក គឺលោក វាំងឌឺ បានទទួលមរណភាពនៅអំឡុងឆ្នាំ ២០០៣។ ក្រោយឪពុកស្លាប់ ក្លាយជាកូនកំព្រាឪពុក រស់នៅជាមួយម្តាយ និង ប្អូនស្រី មិនយូរប៉ុន្មាននៅឆ្នាំ ២០០៥ ម្តាយក៏បានទទួលមរណភាពទៀត ធ្វើឱ្យលោករស់នៅកំព្រាតែលតោលជាមួយនឹងប្អូនស្រី។ ជាអកុសល មកដល់ឆ្នាំ ២០២១ ប្អូនស្រីពៅរបស់លោក ភីដេត គឺកញ្ញា យិន ស្រណែត បានទទួលមរណភាពមួយរូបទៀត ទុកឱ្យរូបលោកតែលតោលតែម្នាក់ឯងមកដល់បច្ចុប្បន្ន៕
