មិនធម្មតា! កីឡាករកាយវប្បកម្មកម្ពុជាមួយរូប ប្រកួតឈ្នះពានច្រើនលើឆាក NPCA HWASEONG នៅកូរ៉េ

លោក Va Vannak ត្រូវបានគេស្គាល់ជាយុវជនខ្មែរមួយរូប ដែលកំពុងរស់នៅលើទឹកដីកូរ៉េ។ ថ្មីៗនេះ ជាមោទកភាពមួយសម្រាប់កម្ពុជា លោកបានតំណាងឱ្យកម្ពុជាចូលប្រកួតក្នុងកម្មវិធីកាយវប្បកម្ម NPCA HWASEONG ដែលធ្វើឡើងនៅទីក្រុងហ្វាសង ប្រទេសកូរ៉េ។ ជាលទ្ធផល ថ្វីបើលោកមិនទទួលបានលេខ ១ ប៉ុន្តែ លោកទទួលបានចំណាត់ថ្នាក់ខ្ពស់ និង ឈ្នះពានរង្វាន់ ក៏ដូចជាមេដាយជាច្រើនផងដែរ។​

ជាក់ស្តែង បើតាមការបង្ហោះនៅលើគណនីរបស់កីឡាករកាយវប្បកម្ម Va Vannak លោកបានបង្ហោះរូបភាពទទួលពាន ភ្ជាប់មកជាមួយសារផ្តាំផ្ញើមកកាន់ប្រជាជនកម្ពុជាយ៉ាងដូច្នេះថា៖ «មោទកភាពនេះមិនសម្រាប់តែរូបខ្ញុំម្នាក់ទេ គឺជាមុខមាត់របស់ប្រទេសកម្ពុជាយើងទាំងមូល។ ខ្មែរនៅកូរ៉េ។ ថ្ងៃនេះខ្ញុំបានចូលរួមប្រកួតកាយវប្បកម្មតំណាងប្រទេសកម្ពុជា ក្នុងកម្មវិធី NPCA HWASEONG នៅទីក្រុងហ្វាសង ប្រទេសកូរ៉េ។  វិញ្ញាសា SPORTS MODEL ខ្ញុំទទួលបានលេខ ៣ ទទួលបានពាន ១ និង មេដាយមាស ១ ។ វិញ្ញាសា BODYBUILDING ខ្ញុំបានលេខ ៦ និង ទទួលបានមេដាយប្រាក់ ១។ វិញ្ញាសា CLASSIC PHYSIQUE ខ្ញុំបានលេខ ៧ និង ទទួលបានមេដាយប្រាក់ ១»។

តាមរយៈការបង្ហាញពីលទ្ធផលនេះដែរ មហាជនជាច្រើននៅលើបណ្តាញសង្គមបានចូលទៅ Comment ជាហូរហែ ដោយសរសេរអបអរសាទរ និង បង្ហាញពីអារម្មណ៍មោទកភាព ដែលលោកបានតំណាងឱ្យកម្ពុជា និង ធ្វើឱ្យកម្ពុជាមានភាពលេចធ្លោនៅលើឆាកអន្តរជាតិ៕​