ថ្មីៗនេះ មាននារីជនជាតិថៃម្នាក់បានទម្លាយរឿងរ៉ាវមួយដែលធ្វើឱ្យមហាជននាំគ្នាភ្ញាក់ផ្អើល ដោយនាងបានឱ្យដឹងថាមានសត្វកណ្តុរមកស៊ីចានបង្គន់នាងរហូតដល់ខ្ទេច។
នារីរូបនេះបានឱ្យដឹងថា នាងស្នាក់នៅក្នុងបន្ទប់មួយដែលស្ថិតនៅក្នុងគម្រោងសំណង់ល្បីឈ្មោះមួយកន្លែង ហើយអ្វីដែលគួរឱ្យភ្ញាក់ផ្អើលគឺមានសត្វកណ្តុរមកកាត់កកេរស៊ីចានបង្គន់របស់នាងឱ្យខូចខាតដាច់ជាដុំៗ។ លើសពីនេះទៀតនៅមានសត្វកន្លាតច្រើនទៀតបានចូលមកក្នុងបន្ទប់នាង បង្កឱ្យមានភាពមិនស្រណុកសុខស្រួលក្នុងការរស់នៅ។ នាងក៏បានព្យាយាមទាក់ទងទៅទីស្នាក់ការកណ្តាលរបស់គម្រោងនេះហើយ ប៉ុន្តែខាងគម្រោងនោះមិនបានទាក់ទងមកដោះស្រាយឱ្យនាងឡើយ។
យ៉ាងណាមិញ ក្រោយពីមហាជនបានឃើញរូបភាពចានបង្គន់ហើយ ម្នាក់ៗពិតជាភ្ញាក់ផ្អើលមិនតិចឡើយ ព្រោះមិននឹកស្មានថាសត្វកណ្តុរអាចស៊ីបានដល់ថ្នាក់នេះឡើយ។ ដោយឡែកសម្រាប់អ្នកមួយចំនួនទៀត ក៏បានមកបញ្ចេញបទពិសោធន៍ខ្លួនទាក់ទងនឹងសត្វកណ្តុរដែលកាត់កកេរស៊ីរបស់របរនៅក្នុងផ្ទះរបស់ខ្លួនផងដែរ៕
ប្រភព៖ Khaosod
