ក្ដៅៗ! បង្ហាញមុខជនសង្ស័យជាសង្សារ ក្រោយធ្វើសកម្មភាពហើយរត់បាន និង ទុកម៉ូតូប្លុងចោលក្បែរខ្លោងទ្វារតាកាវ

នៅព្រឹកថ្ងៃទី ៦ ខែវិច្ឆិកា ឆ្នាំ ២០២៤ នេះ មានករណីនារីមួយរូប ត្រូវបានបាត់បង់ជីវិតក្រោយបញ្ជូនទៅកាន់មន្ទីរពេទ្យ បន្ទាប់ពីរងការចាក់សម្លាប់ពីសំណាក់បុរសម្នាក់ ដែលសង្ស័យថាជាគូស្នេហ៍ នៅតាមបណ្ដោយផ្លូវព្រលានយន្តហោះចាស់ ស្ថិតក្នុងភូមិគោកដូង សង្កាត់ទឹកវិល ក្រុងសៀមរាប ខេត្តសៀមរាប បង្កជាការភ្ញាក់ផ្អើលនឹកស្មានមិនដល់។

ទាក់ទិនទៅនឹងរឿងនេះ បើតាមការឱ្យដឹងព័ត៌មានបឋមពីគណនី Sar Ratha Post បានបញ្ជាក់នៅថ្ងៃទី ០៦ ខែវិច្ឆិកា ឆ្នាំ ២០២៤ នេះ ឱ្យបានដឹងថា ជនរងគ្រោះឈ្មោះ វណ្ណ ភក្តា អាយុ ២៥ ឆ្នាំ ចំណែកជនដៃដល់ដែលសង្ស័យថាជាសង្សារបានរត់គេចខ្លួនបាត់ ក្រោយធ្វើសកម្មភាពចាក់សម្លាប់ ដោយមិនទាន់ដឹងពីមូលហេតុ។

តាមប្រភពខាងលើ ដែលទទួលបានព័ត៌មានពីសមត្ថកិច្ចបានឱ្យដឹងថា មិនបានប៉ុន្មានម៉ោងក្រោយពេលកើតហេតុ ពោលគឺនៅថ្ងៃទី ០៦ ខែវិច្ឆិកា ឆ្នាំ ២០២៤ នេះដដែល កម្លាំងជំនាញ បានប្រទះឃើញម៉ូតូរបស់ជនសង្ស័យប្លុងចោលនៅត្រង់ចំណុចក្បែរខ្លោងទ្វារខាងលិចក្រុងអង្គរធំ (ទ្វារតាកាវ) ស្ថិតក្នុងភូមិគោកតាចាន់ សង្កាត់គោកចក ក្រុងសៀមរាប ខេត្តសៀមរាប ដែលសង្ស័យថា ជនបង្កបានរត់គេចពីកន្លែងកើតហេតុ ហើយអាចនឹងព្យាយាមធ្វើអត្តឃាតដោយលោតទឹកសម្លាប់ខ្លួន។

បច្ចុប្បន្នកម្លាំងជំនាញកំពុងស្វែងរកជនបង្កទាំងក្នុងព្រៃ និង ក្នុងទឹក ដើម្បីយកមកផ្ដន្ទាទោសតាមច្បាប់៕

ប្រភព ៖ Sar Ratha Post