ឆ្នាំនេះបុរសឯកតំណាងកម្ពុជា ៣ រូប សុទ្ធតែសង្ហាៗ មហាជនជាតិ និង អន្តរជាតិ ចាប់អារម្មណ៍ខ្លាំង

អំឡុងចុងឆ្នាំ កម្មវិធីប្រកួតបុរសឯកអន្តរជាតិនានា បានកំពុងសម្រុកជ្រើសរើសម្ចាស់ជ័យលាភីសម្រាប់ឆ្នាំ ២០២៤។ ទន្ទឹមនេះដែរ បេក្ខភាពតំណាងឱ្យកម្ពុជាសម្រាប់ឆ្នាំនេះ ក៏ឃើញថាមុខមាត់ និង រាងរៅ សុទ្ធតែសង្ហាៗ អាចប្រជែងជាមួយបេក្ខភាពមកពីបណ្តាប្រទេសផ្សេងៗជុំវិញពិភពលោក។ យើងសូមលើកពីបេក្ខភាពតំណាងកម្ពុជា ៣ រូប ដែលបច្ចុប្បន្នកំពុងទទួលបានការចាប់អារម្មណ៍ខ្លាំង ពីសំណាក់មហាជនជាតិ និង អន្តរជាតិ។

១. លោក ថុល សុគន្ធរង្សី

លោក ថុល សុគន្ធរង្សី ជាម្ចាស់ជ័យលាភីកម្មវិធី Mister World Cambodia 2024 ។ លោកជានិស្សិតឆ្នាំទី ២​ ផ្នែក​សេដ្ឋកិច្ច​ពាណិជ្ជកម្ម។ លោកនឹងតំណាងឱ្យកម្ពុជាទៅប្រកួតក្នុងក្មវិធី Mister World 2024 ដែលធ្វើឡើងនៅប្រទេសវៀតណាម។ ចំពោះថ្ងៃផ្តាច់ព្រ័ត្រធ្វើនៅ Phan Thiet នៅថ្ងៃទី ២៣ ខែ វិច្ឆិកា ឆ្នាំ ២០២៤។

២. លោក ធា សុខតុលា

បុរសសង្ហាមុខមាត់មានមន្តស្នេហ៍រូបនេះ ត្រូវបានជ្រើសជា Man of The Year Cambodia 2024។ លោកមានអាយុ ២៣ ឆ្នាំ និង កម្ពស់ ១, ៨៣ ម៉ែត្រ។ លោកបានកំពុងតំណាងឱ្យកម្ពុជាប្រកួតកម្មវិធី Man Of The Year 2024 ដែលធ្វើឡើងនៅខេត្តឈៀងម៉ៃ ប្រទេសថៃ ចាប់ពីថ្ងៃទី ០៩-១៩ ខែ វិច្ឆិកា ឆ្នាំ ២០២៤។

៣. លោក ជា ឧត្ដម ហ្វីឌែល 

ក្រោយការប្រកួតប្រជែង និង ជ្រើសរើសយ៉ាងស្វិតស្វាញ ទីបំផុតកម្មវិធី Mister Friendship Cambodia 2024 បានរកឃើញម្ចាស់ជ័យលាភីដែលតំណាងឱ្យប្រទេសកម្ពុជា នោះគឺ លោក ជា ឧត្ដម ហ្វីឌែល។ លោកមានអាយុ ២៨ ឆ្នាំ កម្ពស់ ១,៨០ ជាកូនខ្មែរកើតនៅប្រទេសបារាំង ហើយឥលូវនេះ លោកបានផ្លាស់ទីលំនៅមកទីក្រុងភ្នំពេញ ជាកន្លែងដែលលោកធ្វើការជាអ្នកថតកាំរស្មីនៅមន្ទីរពេទ្យ និង ជាអ្នកស្ម័គ្រចិត្តជាមួយអង្គការក្រៅរដ្ឋាភិបាល ដែលបង្រៀនភាសាអង់គ្លេស និង បារាំង។ លោកក៏បន្តចំណង់ចំណូលចិត្តទៅលើការថតរូបផងដែរ។ លោកអាចនិយាយបាន ៣ ភាសា គឺ បារាំង អង់គ្លេស និង ខ្មែរ។ លោកនឹងទៅប្រកួតកម្មវិធី Mister Friendship International 2024 នៅឯប្រទេសតៃវ៉ាន់៕